abhi nahin ki abhi mahz istiara bana

abhī nahīñ ki abhī mahz isti.āra banā

tū yaar dast-e-haqīqat mujhe dobāra banā

ki bah na jā.ūñ maiñ dariyā kī rasm-e-ijrā meñ

qayām de mirī miTTī mujhe kināra banā

ham apnā aks to chhoḌ aa.e the par us ke ba.ad

ḳhabar nahīñ ki un āñkhoñ meñ kyā hamārā banā

mujhe jo banñā hai ban jā.ūñgā ḳhud apne aap

banāne vaale mujhe ḳhuub pāra-pāra banā

hujūm-e-shahr ki jis kī mulāzmat meñ huuñ maiñ

mire liye mirī tanhā.ī kā idāra banā

isī liye to munāfe.a meñ hai havas kā kaam

ki ishq mere liye bā.is-e-ḳhasāra banā

shikāriyoñ ko khulā chhoḌ dasht-e-ma.anī meñ

tū apne lafz ko 'ehsās' mahz ishāra banā

abhi nahin ki abhi mahz istiara bana

tu yar dast-e-haqiqat mujhe dobara bana

ki bah na jaun main dariya ki rasm-e-ijra mein

qayam de meri miTTi mujhe kinara bana

hum apna aks to chhoD aae the par us ke baad

KHabar nahin ki un aankhon mein kya hamara bana

mujhe jo banna hai ban jaunga KHud apne aap

banane wale mujhe KHub para-para bana

hujum-e-shahr ki jis ki mulazmat mein hun main

mere liye meri tanhai ka idara bana

isi liye to munafea mein hai hawas ka kaam

ki ishq mere liye bais-e-KHasara bana

shikariyon ko khula chhoD dasht-e-mani mein

tu apne lafz ko 'ehsas' mahz ishaara bana