abhi ruThi hui hai par yahi taswir bolegi

abhī rūThī huī hai par yahī tasvīr bolegī

yaqīnan ek din ham se hamārī hiir bolegī

mire dushman abhī hai vaqt to samjhā rahā huuñ maiñ

agar maiñ chup huā to phir mirī shamshīr bolegī

are nādān duniyā meñ tirā kirdār bolegā

ye kis ne kah diyā tujh se tirī jāgīr bolegī

miyāñ qismat ko rone se yahāñ kuchh bhī nahīñ hogā

yahāñ tadbīr se insān kī taqdīr bolegī

vafā ke naam par sāhab hamārā muñh na khulvāo

agar bolī zabāñ to phir misāl-e-tīr bolegī

libās-e-jism phaT jaa.e mirī gardan bhī kaT jaa.e

magar ye ruuh phir bhī nāra-e-takbīr bolegī

zabāñ bole yā na bole magar 'sājid' zamāne meñ

jo likh kar chhoḌ jā.ūñgā vahī tahrīr bolegī

abhi ruThi hui hai par yahi taswir bolegi

yaqinan ek din hum se hamari hir bolegi

mere dushman abhi hai waqt to samjha raha hun main

agar main chup hua to phir meri shamshir bolegi

are nadan duniya mein tera kirdar bolega

ye kis ne kah diya tujh se teri jagir bolegi

miyan qismat ko rone se yahan kuchh bhi nahin hoga

yahan tadbir se insan ki taqdir bolegi

wafa ke nam par sahab hamara munh na khulwao

agar boli zaban to phir misal-e-tir bolegi

libas-e-jism phaT jae meri gardan bhi kaT jae

magar ye ruh phir bhi nara-e-takbir bolegi

zaban bole ya na bole magar 'sajid' zamane mein

jo likh kar chhoD jaunga wahi tahrir bolegi