abhi se neze pe quran darmiyan mein hai

abhī se neze pe qur.ān darmiyān meñ hai

mire harīf mirā tiir abhī kamān meñ hai

'ajīb shaḳhs hai jaadū sā kyā bayān meñ hai

zabān meñ hai dil us kā ki dil zabān meñ hai

pahāḌ kaaT rahā huuñ tarāshne ke liye

vo ik shabīh jo pinhāñ kisī chaTān meñ hai

bulandiyoñ se utarne meñ der ho shāyad

havas kā shoḳh parinda abhī uḌaan meñ hai

fuġhāñ ki haarī huī jang ke mahāz pe huuñ

hai tiir apnā magar ġhair kī kamān meñ hai

usī ke dam se bachī aabrū qabīle kī

vo ek shaḳhs jo āvāra ḳhāndān meñ hai

havas ke būḌhe shikārī ne aah bhar ke kahā

thakā huā hai parinda magar uḌaan meñ hai

sarā.e-jāñ ke musāfir ko kyā kahā jaa.e

kirā.e-dār huuñ maiñ aur vo makān meñ hai

ye ek dost ne likkhā hai ḳhat meñ ai 'unvān'

tirī jagah mirī palkoñ ke sā.ebān meñ hai

abhi se neze pe quran darmiyan mein hai

mere harif mera tir abhi kaman mein hai

'ajib shaKHs hai jadu sa kya bayan mein hai

zaban mein hai dil us ka ki dil zaban mein hai

pahaD kaT raha hun tarashne ke liye

wo ek shabih jo pinhan kisi chaTan mein hai

bulandiyon se utarne mein der ho shayad

hawas ka shoKH parinda abhi uDan mein hai

fughan ki haari hui jang ke mahaz pe hun

hai tir apna magar ghair ki kaman mein hai

usi ke dam se bachi aabru qabile ki

wo ek shaKHs jo aawara KHandan mein hai

hawas ke buDhe shikari ne aah bhar ke kaha

thaka hua hai parinda magar uDan mein hai

sarae-jaan ke musafir ko kya kaha jae

kirae-dar hun main aur wo makan mein hai

ye ek dost ne likkha hai KHat mein ai 'unwan'

teri jagah meri palkon ke saeban mein hai