abr chhaega kabhi dhup bikhar jaegi

abr chhā.egā kabhī dhuup bikhar jā.egī

zindagī hai to bahar-hāl guzar jā.egī

ham jo har kaam ke anjām pe Dāleñge nazar

ruuh ġhunchoñ ke tabassum se bhī Dar jā.egī

fikr kī sham.a karoge jo shab-e-ġham raushan

raushnī tah meñ añdhere ke utar jā.egī

zindagī dahr meñ sone kī tarah hai apnī

ātish-e-ġham meñ tapegī to nikhar jā.egī

ham jidhar hoñge udhar aañkh uThegī kis kī

vo jidhar hoñge udhar sab kī nazar jā.egī

tum mohabbat hī na doge to mohabbat kaisī

ghar meñ vo chiiz hī niklegī jo ghar jā.egī

ab ke gahrā hai bahut rang-e-bahārāñ 'nazmī'

ab ke vahshat mirī le kar mirā sar jā.egī

abr chhaega kabhi dhup bikhar jaegi

zindagi hai to bahar-haal guzar jaegi

hum jo har kaam ke anjam pe Dalenge nazar

ruh ghunchon ke tabassum se bhi Dar jaegi

fikr ki shama karoge jo shab-e-gham raushan

raushni tah mein andhere ke utar jaegi

zindagi dahr mein sone ki tarah hai apni

aatish-e-gham mein tapegi to nikhar jaegi

hum jidhar honge udhar aankh uThegi kis ki

wo jidhar honge udhar sab ki nazar jaegi

tum mohabbat hi na doge to mohabbat kaisi

ghar mein wo chiz hi niklegi jo ghar jaegi

ab ke gahra hai bahut rang-e-bahaaran 'nazmi'

ab ke wahshat meri le kar mera sar jaegi