abr ko rokte hain aab talab karte hain

abr ko rokte haiñ aab talab karte haiñ

dasht saada haiñ ki tālāb talab karte haiñ

masḳhare-pan kī bhī had hotī hai koī yā'nī

log dariyāoñ se sailāb talab karte haiñ

un ko hai apne nazāroñ kī sajāvaT se ġharaz

khiḌkiyoñ vaale to mahtāb talab karte haiñ

ham ki kar lete haiñ sūrāḳh safīne meñ ḳhud

ham ki ḳhud bahr meñ girdāb talab karte haiñ

un ko maġhmūm tanaffus meñ sukūñ miltā hai

ahl-e-dil ḳhud dil-e-betāb talab karte haiñ

kal talak sabz nazāroñ meñ numāyāñ the miyāñ

ham jo ab dīda-e-ḳhūñ-nāb talab karte haiñ

ab thakan jān-kanī ke hai mumāsil Thahrī

ab tirā lams ye ā'sāb talab karte haiñ

is meñ ab zard zamānoñ kā dhuāñ uḌtā hai

aap jis dil se tab-o-tāb talab karte haiñ

haath malte haiñ 'hayā' aañkh kī 'uryānī par

ham jo har shab se nayā ḳhvāb talab karte haiñ

abr ko rokte hain aab talab karte hain

dasht sada hain ki talab talab karte hain

masKHare-pan ki bhi had hoti hai koi ya'ni

log dariyaon se sailab talab karte hain

un ko hai apne nazaron ki sajawaT se gharaz

khiDkiyon wale to mahtab talab karte hain

hum ki kar lete hain suraKH safine mein KHud

hum ki KHud bahr mein girdab talab karte hain

un ko maghmum tanaffus mein sukun milta hai

ahl-e-dil KHud dil-e-betab talab karte hain

kal talak sabz nazaron mein numayan the miyan

hum jo ab dida-e-KHun-nab talab karte hain

ab thakan jaan-kani ke hai mumasil Thahri

ab tera lams ye aa'sab talab karte hain

is mein ab zard zamanon ka dhuan uDta hai

aap jis dil se tab-o-tab talab karte hain

hath malte hain 'haya' aankh ki 'uryani par

hum jo har shab se naya KHwab talab karte hain