abr kyā ghir ghir ke aayā khul gayā
bas sabāt-e-bahr-e-duniyā khul gayā
rāz-e-dil kitnā chhupāyā khul gayā
haal is daulat-sarā kā khul gayā
husn-e-āriz aarzī thā khul gayā
ḳhat ke aate hī lifāfa khul gayā
aañkh se rūmāl sarkā ba.ad-e-marg
chashm-e-tar kā aaj pardā khul gayā
tum jo bole ho gayā sābit dahan
bātoñ hī bātoñ meñ uqda khul gayā
kaT gayā sar hal huī mushkil mirī
nāḳhun-e-ḳhanjar se uqda khul gayā
be-zabānī bāteñ sunvāne lagī
gāliyoñ par muñh tumhārā khul gayā
thā qalam-band apnī āzādī kā haal
ḳhat ko jab us ne lapeTā khul gayā
ḳhat pe ḳhat laa.e jo murġh-e-nāma-bar
bole in murġhoñ kā Darbā khul gayā
abr kya ghir ghir ke aaya khul gaya
bas sabaat-e-bahr-e-duniya khul gaya
raaz-e-dil kitna chhupaya khul gaya
haal is daulat-sara ka khul gaya
husn-e-ariz aarzi tha khul gaya
KHat ke aate hi lifafa khul gaya
aankh se rumal sarka baad-e-marg
chashm-e-tar ka aaj parda khul gaya
tum jo bole ho gaya sabit dahan
baaton hi baaton mein uqda khul gaya
kaT gaya sar hal hui mushkil meri
naKHun-e-KHanjar se uqda khul gaya
be-zabani baaten sunwane lagi
galiyon par munh tumhaara khul gaya
tha qalam-band apni aazadi ka haal
KHat ko jab us ne lapeTa khul gaya
KHat pe KHat lae jo murgh-e-nama-bar
bole in murghon ka Darba khul gaya
Source:
Daftar-e-Fasahat (Pg. ebook-63 page-47)
-
Author:
Khwaja Mohammad Wazir
-
- Edition: 1847
- Publisher: Matba Mustafai, Lucknow
- Year of Publication: 1847
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.