achchha hua ki mera nasha bhi utar gaya

achchhā huā ki merā nasha bhī utar gayā

terī kalā.ī se ye kaḌā bhī utar gayā

vo mutma.in bahut hai mirā saath chhoḌ kar

maiñ bhī huuñ ḳhush ki qarz mirā bhī utar gayā

ruḳhsat kā vaqt hai yūñhī chehra khilā rahe

maiñ TuuT jā.ūñgā jo zarā bhī utar gayā

bekas kī aarzū meñ pareshāñ hai zindagī

ab to fasīl-e-jāñ se diyā bhī utar gayā

ro-dho ke vo bhī ho gayā ḳhāmosh ek roz

do-chār din meñ rañg-e-hinā bhī utar gayā

paanī meñ vo kashish hai ki allāh kī panāh

rassī kā haath thāme ghaḌā bhī utar gayā

vo muflisī ke din bhī guzāre haiñ maiñ ne jab

chūlhe se ḳhālī haath tavā bhī utar gayā

sach bolne meñ nashsha ka.ī botaloñ kā thā

bas ye huā ki merā galā bhī utar gayā

pahle bhī be-libās the itne magar na the

ab jism se libās-e-hayā bhī utar gayā

achchha hua ki mera nasha bhi utar gaya

teri kalai se ye kaDa bhi utar gaya

wo mutmain bahut hai mera sath chhoD kar

main bhi hun KHush ki qarz mera bhi utar gaya

ruKHsat ka waqt hai yunhi chehra khila rahe

main TuT jaunga jo zara bhi utar gaya

bekas ki aarzu mein pareshan hai zindagi

ab to fasil-e-jaan se diya bhi utar gaya

ro-dho ke wo bhi ho gaya KHamosh ek roz

do-chaar din mein rang-e-hina bhi utar gaya

pani mein wo kashish hai ki allah ki panah

rassi ka hath thame ghaDa bhi utar gaya

wo muflisi ke din bhi guzare hain main ne jab

chulhe se KHali hath tawa bhi utar gaya

sach bolne mein nashsha kai botalon ka tha

bas ye hua ki mera gala bhi utar gaya

pahle bhi be-libas the itne magar na the

ab jism se libas-e-haya bhi utar gaya