achchha hua ye waqt to aana zarur tha

achchhā huā ye vaqt to aanā zarūr thā

muddat se kashmakash meñ dil-e-nā-subūr thā

duniyā kā hoshiyār baḌā zī-shu.ūr thā

jab tak mire kahe meñ dil-e-nā-subūr thā

merā qusūr merī nazar kā qusūr thā

vo jis qadar qarīb thā utnā hī duur thā

achchhā huā jo dil kī taḌap aur baḌh ga.ī

jaanā bhī un kī bazm meñ mujh ko zarūr thā

us be-nishāñ kā aaj nishāñ DhūñDte haiñ aap

suniye vahī jo nāzish-e-ahl-e-qubūr thā

vo daur merī umr kā thā yādgār daur

jis meñ ki tere husn pe mujh ko ġhurūr thā

le aayā kaun gor-e-ġharībāñ meñ khīñch kar

kosoñ abhī maiñ manzil-e-maqsad se duur thā

vaa.iz ne zikr-e-va.ada-e-firdaus kyuuñ kiyā

us rind se jo nashsha-e-vahdat se chuur thā

ab aa ke merī laash se farmā rahe haiñ vo

'ālim' ye terī aql-o-farāsat se duur thā

achchha hua ye waqt to aana zarur tha

muddat se kashmakash mein dil-e-na-subur tha

duniya ka hoshiyar baDa zi-shuur tha

jab tak mere kahe mein dil-e-na-subur tha

mera qusur meri nazar ka qusur tha

wo jis qadar qarib tha utna hi dur tha

achchha hua jo dil ki taDap aur baDh gai

jaana bhi un ki bazm mein mujh ko zarur tha

us be-nishan ka aaj nishan DhunDte hain aap

suniye wahi jo nazish-e-ahl-e-qubur tha

wo daur meri umr ka tha yaadgar daur

jis mein ki tere husn pe mujh ko ghurur tha

le aaya kaun gor-e-ghariban mein khinch kar

koson abhi main manzil-e-maqsad se dur tha

waiz ne zikr-e-wada-e-firdaus kyun kiya

us rind se jo nashsha-e-wahdat se chur tha

ab aa ke meri lash se farma rahe hain wo

'alim' ye teri aql-o-farasat se dur tha