achchha nahin hota kabhi bimar-e-mohabbat

achchhā nahīñ hotā kabhī bīmār-e-mohabbat

goyā marazul-maut hai āzār-e-mohabbat

kyoñ sard hai ab josh-e-ḳharīdār-e-mohabbat

kyā ho ga.ī vo garmī-e-bāzār-e-mohabbat

mā'lūm huā ab ki vo thiiñ bāteñ hī bāteñ

shoḳhī se sharārat se thā iqrār-e-mohabbat

yā aise vo bhūle ki samajhte hī nahīñ kuchh

yā ḳhud mujhe aatā nahīñ iz.hār-e-mohabbat

haiñ ek hī Dore meñ bañdhe shaiḳh-o-barahman

donoñ hī kī gardan meñ hai zunnār-e-mohabbat

gul-daste haiñ zaḳhmoñ ke kañval dāġhoñ ke dil meñ

kyā turfa hai ārā.ish-e-darbār-e-mohabbat

chitvan kahe detī hai ki ulfat hai use bhī

kyā farz hai muñh khol ke iqrār-e-mohabbat

lazzat vo shakar meñ na maza shahd kā aisā

kuchh aur hai shīrīnī-e-guftār-e-mohabbat

mahshar meñ 'ḳhayāl' aaj kareñ us kā gila kyā

duniyā meñ to karte rahe iz.hār-e-mohabbat

achchha nahin hota kabhi bimar-e-mohabbat

goya marazul-maut hai aazar-e-mohabbat

kyon sard hai ab josh-e-KHaridar-e-mohabbat

kya ho gai wo garmi-e-bazar-e-mohabbat

ma'lum hua ab ki wo thin baaten hi baaten

shoKHi se shararat se tha iqrar-e-mohabbat

ya aise wo bhule ki samajhte hi nahin kuchh

ya KHud mujhe aata nahin izhaar-e-mohabbat

hain ek hi Dore mein bandhe shaiKH-o-barahman

donon hi ki gardan mein hai zunnar-e-mohabbat

gul-daste hain zaKHmon ke kanwal daghon ke dil mein

kya turfa hai aaraish-e-darbar-e-mohabbat

chitwan kahe deti hai ki ulfat hai use bhi

kya farz hai munh khol ke iqrar-e-mohabbat

lazzat wo shakar mein na maza shahd ka aisa

kuchh aur hai shirini-e-guftar-e-mohabbat

mahshar mein 'KHayal' aaj karen us ka gila kya

duniya mein to karte rahe izhaar-e-mohabbat