achchhe nahin hain waqt ke tewar mere aziz

achchhe nahīñ haiñ vaqt ke tevar mire aziiz

rahnā hai apnī khaal ke andar mire aziiz

terī munāfiqat pe mujhe koī shak nahīñ

mere rafīq mere barādar mire aziiz

aa terī tishnagī kā mudāvā hai mere paas

merā lahū halāl hai tujh par mire aziiz

ehsās jis kā naam hai vo chiiz mustaqil

chubhtī hai mere zehn ke andar mire aziiz

aur is meñ tair kar mujhe honā hai surḳh-rū

darpesh hai lahū kā samundar mire aziiz

nādān vāhimoñ ke ta.āqub se baaz aa

koī nahīñ kisī kā yaqīñ kar mire aziiz

mumkin jo ho to us se rihā.ī dilā mujhe

mujh par hai bār-e-dosh mirā sar mire aziiz

iz.hār-e-haq se baaz kab aate haiñ aise log

'rāhī' ho yā hoñ 'shād'-o-'muzaffar' mire aziiz

achchhe nahin hain waqt ke tewar mere aziz

rahna hai apni khaal ke andar mere aziz

teri munafiqat pe mujhe koi shak nahin

mere rafiq mere baradar mere aziz

aa teri tishnagi ka mudawa hai mere pas

mera lahu halal hai tujh par mere aziz

ehsas jis ka nam hai wo chiz mustaqil

chubhti hai mere zehn ke andar mere aziz

aur is mein tair kar mujhe hona hai surKH-ru

darpesh hai lahu ka samundar mere aziz

nadan wahimon ke taaqub se baz aa

koi nahin kisi ka yaqin kar mere aziz

mumkin jo ho to us se rihai dila mujhe

mujh par hai bar-e-dosh mera sar mere aziz

izhaar-e-haq se baz kab aate hain aise log

'rahi' ho ya hon 'shad'-o-'muzaffar' mere aziz