adaen hain jo us rashk-e-pari mein

adā.eñ haiñ jo us rashk-e-parī meñ

na DhūñDe se mileñgī vo kisī meñ

na dekhī vo kisī kī dushmanī meñ

jo aafat hai tumhārī dostī meñ

taġhāful kis qadar himmat-shikan hai

nahīñ hai ab koī armān jī meñ

taḌapte haiñ hazāroñ kushta-e-ġham

qayāmat hai bapā terī galī meñ

banāvaT meñ vo kaifiyyat kahāñ hai

mazā hai jo tumhārī sādgī meñ

vo kab sunñe lage haiñ shikva-e-ġham

ḳhafā ho jaate haiñ jo dil-lagī meñ

judā jab se hue ho tum mirī jaañ

kamī kuchh aa ga.ī hai zindagī meñ

vahī dil ko bachā saktā hai ġham se

kabhī jo ḳhush nahīñ hotā ḳhushī meñ

bachānā har balā se ai ḳhudā tū

tirā hī aasrā hai be-kasī meñ

jo dil meñ bas rahā hai kaun hai vo

kise ma.alūm hai ye be-ḳhudī meñ

tumhīñ ko chhīntī hai mujh se duniyā

mile the ek tum hī zindagī meñ

na bhūlegī ye sair-e-bāġh 'hājir'

kisī ko saath le kar chāñdnī meñ

adaen hain jo us rashk-e-pari mein

na DhunDe se milengi wo kisi mein

na dekhi wo kisi ki dushmani mein

jo aafat hai tumhaari dosti mein

taghaful kis qadar himmat-shikan hai

nahin hai ab koi arman ji mein

taDapte hain hazaron kushta-e-gham

qayamat hai bapa teri gali mein

banawaT mein wo kaifiyyat kahan hai

maza hai jo tumhaari sadgi mein

wo kab sunne lage hain shikwa-e-gham

KHafa ho jate hain jo dil-lagi mein

juda jab se hue ho tum meri jaan

kami kuchh aa gai hai zindagi mein

wahi dil ko bacha sakta hai gham se

kabhi jo KHush nahin hota KHushi mein

bachana har bala se ai KHuda tu

tera hi aasra hai be-kasi mein

jo dil mein bas raha hai kaun hai wo

kise malum hai ye be-KHudi mein

tumhin ko chhinti hai mujh se duniya

mile the ek tum hi zindagi mein

na bhulegi ye sair-e-bagh 'hajir'

kisi ko sath le kar chandni mein