adab-navāz to ho koī fan-shanās to ho
hameñ bhī shahr meñ jiine kī koī aas to ho
ye kyā ki maiñ hī sahe jā.ūñ rañj-e-tanhā.ī
mirī tarah kabhī us kā jī udaas to ho
chale to kaise chale silsila mohabbat kā
vo be-ruḳhī hī sahī kuchh na kuchh asaas to ho
ye aarzū hai kabhī maiñ bhī khiḌkiyāñ kholūñ
magar galī kī havā mere ghar ko raas to ho
lahū lahū hai badan phir bhī zindagī ke liye
mire laboñ pe koī harf-e-nā-sipās to ho
is iltifāt ko maiñ kaise be-ruḳhī samjhūñ
nazar se duur sahī dil ke aas paas to ho
ye us ke aate hī kyuuñ chup sī lag ga.ī 'ḳhāvar'
vo sāmne hai to kuchh us se iltimās to ho
adab-nawaz to ho koi fan-shanas to ho
hamein bhi shahr mein jine ki koi aas to ho
ye kya ki main hi sahe jaun ranj-e-tanhai
meri tarah kabhi us ka ji udas to ho
chale to kaise chale silsila mohabbat ka
wo be-ruKHi hi sahi kuchh na kuchh asas to ho
ye aarzu hai kabhi main bhi khiDkiyan kholun
magar gali ki hawa mere ghar ko ras to ho
lahu lahu hai badan phir bhi zindagi ke liye
mere labon pe koi harf-e-na-sipas to ho
is iltifat ko main kaise be-ruKHi samjhun
nazar se dur sahi dil ke aas pas to ho
ye us ke aate hi kyun chup si lag gai 'KHawar'
wo samne hai to kuchh us se iltimas to ho
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.