adam se lai hai hasti mein justuju teri

'adam se laa.ī hai hastī meñ justujū terī

Thaharne degī yahāñ bhī na aarzū terī

basar huī shab-e-ġham kis tarah se pūchh to le

mire taḌapne kī shāhid hai aarzū terī

hai kā'be meñ na tasallī na but-kade meñ sukūñ

mujhe kahīñ kā na rakkhegī aarzū terī

shab-e-firāq meñ ab jaan le ke niklegī

ajal ke bhes meñ aa.ī hai aarzū terī

kalīm de chuke ab merā imtihāñ le le

mujhe bhī tuur pe laa.ī hai aarzū terī

tasalliyāñ to shab-e-ġham meñ dil ko detī hai

kahūñgā tujh se to achchhī hai aarzū terī

butoñ ko marja’-e-hājat banā na ai 'rāfat'

kahīñ banā na de kāfir ye aarzū terī

'adam se lai hai hasti mein justuju teri

Thaharne degi yahan bhi na aarzu teri

basar hui shab-e-gham kis tarah se puchh to le

mere taDapne ki shahid hai aarzu teri

hai ka'be mein na tasalli na but-kade mein sukun

mujhe kahin ka na rakkhegi aarzu teri

shab-e-firaq mein ab jaan le ke niklegi

ajal ke bhes mein aai hai aarzu teri

kalim de chuke ab mera imtihan le le

mujhe bhi tur pe lai hai aarzu teri

tasalliyan to shab-e-gham mein dil ko deti hai

kahunga tujh se to achchhi hai aarzu teri

buton ko marja’-e-hajat bana na ai 'rafat'

kahin bana na de kafir ye aarzu teri