adib tha na main koi baDa sahafi tha

adiib thā na maiñ koī baḌā sahāfī thā

zamāna phir bhī mire fan kā e'tirāfī thā

mujhe bhī zahr diyā kyuuñ na haq-bayānī par

ki ye gunāh to nā-qābil-e-muāfī thā

kisī se ek bhī fitrat kā raaz khul na sakā

agarche daur zamāne kā inkishāfī thā

musībatoñ ne to nāhaq uThā.īñ taklīfeñ

mujhe miTāne ko merā shabāb kaafī thā

dil-o-nazar na ulajhte to hal nikal aatā

hazār mas.ala-e-dīd iḳhtilāfī thā

vo merī raa.e se to muttafiq thā ai 'fāzil'

zarīf-kār magar us kā inhirāfī thā

adib tha na main koi baDa sahafi tha

zamana phir bhi mere fan ka e'tirafi tha

mujhe bhi zahr diya kyun na haq-bayani par

ki ye gunah to na-qabil-e-muafi tha

kisi se ek bhi fitrat ka raaz khul na saka

agarche daur zamane ka inkishafi tha

musibaton ne to nahaq uThain taklifen

mujhe miTane ko mera shabab kafi tha

dil-o-nazar na ulajhte to hal nikal aata

hazar masala-e-did iKHtilafi tha

wo meri rae se to muttafiq tha ai 'fazil'

zarif-kar magar us ka inhirafi tha