adl se munh moD kar jab munsifi hone lage

adl se muñh moḌ kar jab munsifī hone lage

saḳht kāfir jurm bhī ab maz.habī hone lage

tishnagī kī aañkh meñ be-samt tevar dekh kar

kitne dariyā-dil samundar bhī nadī hone lage

hasrateñ palne lagī haiñ phir nubuvvat ke liye

kuchh dinoñ meñ kyā ḳhabar paiġhambarī hone lage

intihā ko jab bhī pahuñche qurbatoñ kā ishtiyāq

kyā patā jibrīl kī bhī hamsarī hone lage

qalb tak pahuñchī nahīñ jin ke sharāb-e-ma.arifat

aise farzī log da.ave se valī hone lage

ishq ko ab le chaleñ aao ik aise moḌ par

pyaar meñ jo kuchh bhī ho vo bandagī hone lage

mil ga.ī haiñ vaqt ko jaane kahāñ kī vus.ateñ

in dinoñ lagtā hai lamhe bhī sadī hone lage

adl se munh moD kar jab munsifi hone lage

saKHt kafir jurm bhi ab mazhabi hone lage

tishnagi ki aankh mein be-samt tewar dekh kar

kitne dariya-dil samundar bhi nadi hone lage

hasraten palne lagi hain phir nubuwwat ke liye

kuchh dinon mein kya KHabar paighambari hone lage

intiha ko jab bhi pahunche qurbaton ka ishtiyaq

kya pata jibril ki bhi hamsari hone lage

qalb tak pahunchi nahin jin ke sharab-e-marifat

aise farzi log dawe se wali hone lage

ishq ko ab le chalen aao ek aise moD par

pyar mein jo kuchh bhi ho wo bandagi hone lage

mil gai hain waqt ko jaane kahan ki wusaten

in dinon lagta hai lamhe bhi sadi hone lage