'adū ġhair ne tujh ko dilbar banāyā
koī joḌ mujh par muqarrar banāyā
koī sarv rakhtā na thā raast ye hai
tire qad ko maiñ ne sanobar banāyā
kiyā maiñ ne jallād use apne haq meñ
sitam sahte sahte sitamgar banāyā
na gintā thā koī hasīnoñ meñ o but
tujhe de ke dil maiñ ne dilbar banāyā
shakar-lab kahā maiñ ne kaḌve hue tum
abas muñh ko mujh se sitamgar banāyā
'anāsir se ḳhāliq ne ḳhilqat banā.ī
tujhe nuur se hūr-paikar banāyā
tirā āshiq-e-zār roz-e-azal se
banāyā mujhe o sitamgar banāyā
bhalā kyā javāb is kā degā tū qātil
agar ḳhuun kā maiñ ne mahzar banāyā
mirī aql hairāñ hai bār-e-ilāhā
tilismāt-e-duniyā ko kyūñ-kar banāyā
paḌī jaan uḌne lagā mere 'iisā
ruī kā jo tū ne kabūtar banāyā
hama-vaqt mumkin nahīñ vasl-e-dilbar
hañsī-khel kyā jān-e-muztar banāyā
vo huuñ sāhib-e-zarf hargiz na chhalkā
agar ḳhaak kā merī sāġhar banāyā
ḳhayāl-e-dahan ne kiyā tañg mujh ko
kamar ke tasavvur ne lāġhar banāyā
ghule soz-e-furqat meñ us sham'-rū ke
ye haal apnā kyuuñ 'rind' jal kar banāyā
'adu ghair ne tujh ko dilbar banaya
koi joD mujh par muqarrar banaya
koi sarw rakhta na tha rast ye hai
tere qad ko main ne sanobar banaya
kiya main ne jallad use apne haq mein
sitam sahte sahte sitamgar banaya
na ginta tha koi hasinon mein o but
tujhe de ke dil main ne dilbar banaya
shakar-lab kaha main ne kaDwe hue tum
abas munh ko mujh se sitamgar banaya
'anasir se KHaliq ne KHilqat banai
tujhe nur se hur-paikar banaya
tera aashiq-e-zar roz-e-azal se
banaya mujhe o sitamgar banaya
bhala kya jawab is ka dega tu qatil
agar KHun ka main ne mahzar banaya
meri aql hairan hai bar-e-ilaha
tilismat-e-duniya ko kyun-kar banaya
paDi jaan uDne laga mere 'isa
rui ka jo tu ne kabutar banaya
hama-waqt mumkin nahin wasl-e-dilbar
hansi-khel kya jaan-e-muztar banaya
wo hun sahib-e-zarf hargiz na chhalka
agar KHak ka meri saghar banaya
KHayal-e-dahan ne kiya tang mujh ko
kamar ke tasawwur ne laghar banaya
ghule soz-e-furqat mein us sham'-ru ke
ye haal apna kyun 'rind' jal kar banaya
Source:
Deewan-e-Rind(Guldast-e-ishq) (Rekhta Website) (Pg. 38)
-
Author:
Rind Lakhnavi
-
- Edition: 1931
- Publisher: Munshi Nawal Kishor, Lucknow
- Year of Publication: 1930
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.