afsos tumhein car ke shishe ka hua hai

afsos tumheñ car ke shīshe kā huā hai

parvā nahīñ ik maañ kā jo dil TuuT gayā hai

hotā hai asar tum pe kahāñ nāla-e-ġham kā

barham jo huī bazm-e-tarab is kā gilā hai

fir.aun bhī namrūd bhī guzre haiñ jahāñ meñ

rahtā hai yahāñ kaun yahāñ kaun rahā hai

tum zulm kahāñ tak tah-e-aflāk karoge

ye baat na bhūlo ki hamārā bhī ḳhudā hai

āzādi-e-insāñ ke vahīñ phuul khileñge

jis jā pe zahīr aaj tirā ḳhuun girā hai

tā-chand rahegī ye shab-e-ġham kī siyāhī

rasta koī sūraj kā kahīñ rok sakā hai

tū aaj kā shā.ir hai to kar merī tarah baat

jaise mire hoñToñ pe mire dil kī sadā hai

afsos tumhein car ke shishe ka hua hai

parwa nahin ek man ka jo dil TuT gaya hai

hota hai asar tum pe kahan nala-e-gham ka

barham jo hui bazm-e-tarab is ka gila hai

firaun bhi namrud bhi guzre hain jahan mein

rahta hai yahan kaun yahan kaun raha hai

tum zulm kahan tak tah-e-aflak karoge

ye baat na bhulo ki hamara bhi KHuda hai

aazadi-e-insan ke wahin phul khilenge

jis ja pe zahir aaj tera KHun gira hai

ta-chand rahegi ye shab-e-gham ki siyahi

rasta koi suraj ka kahin rok saka hai

tu aaj ka shair hai to kar meri tarah baat

jaise mere honTon pe mere dil ki sada hai