agar alfaz se gham ka izala ho gaya hota

agar alfāz se ġham kā izāla ho gayā hotā

haqīqat to na hotī bas dikhāvā ho gayā hotā

agar apnā samajh kar sirf ik āvāz de jaate

yaqīñ maano ki merā dil tumhārā ho gayā hotā

shab-e-furqat meñ jitne ḳhvāb bhī milne ke dekhe the

agar ta.abīr miltī to ujālā ho gayā hotā

na karte munqata.a gar tum marāsim kī hasīñ rāheñ

to qāsid ḳhat mirā dene ravāna ho gayā hotā

mohabbat kī agar pākīzgī par tum yaqīñ karte

to mil kar tum se puurā sab ḳhasārā ho gayā hotā

mirī āshuftagī par ab zamāne ko ta.ajjub kyuuñ

agar ulfat na hotī dil siyānā ho gayā hotā

dil-e-furqat-zada meñ hai jo ik nāsūr muddat se

muālij gar samajh paatā ifāqa ho gayā hotā

jo dukh kī fasl boī hai to ab dukh kāTnā hogā

mukāfāt-e-amal samjhe ishāra ho gayā hotā

ye hikmat hai 'sabīla' ziist meñ rab ne kamī rakkhī

vagarna har bashar ḳhud meñ ḳhudā sā ho gayā hotā

agar alfaz se gham ka izala ho gaya hota

haqiqat to na hoti bas dikhawa ho gaya hota

agar apna samajh kar sirf ek aawaz de jate

yaqin mano ki mera dil tumhaara ho gaya hota

shab-e-furqat mein jitne KHwab bhi milne ke dekhe the

agar tabir milti to ujala ho gaya hota

na karte munqata gar tum marasim ki hasin rahen

to qasid KHat mera dene rawana ho gaya hota

mohabbat ki agar pakizgi par tum yaqin karte

to mil kar tum se pura sab KHasara ho gaya hota

meri aashuftagi par ab zamane ko tajjub kyun

agar ulfat na hoti dil siyana ho gaya hota

dil-e-furqat-zada mein hai jo ek nasur muddat se

mualij gar samajh pata ifaqa ho gaya hota

jo dukh ki fasl boi hai to ab dukh kaTna hoga

mukafat-e-amal samjhe ishaara ho gaya hota

ye hikmat hai 'sabila' zist mein rab ne kami rakkhi

wagarna har bashar KHud mein KHuda sa ho gaya hota