agar anar mein wo raushni nahin bharta

agar anaar meñ vo raushnī nahīñ bhartā

to ḳhāksār dam-e-āgahī nahīñ bhartā

ye bhuuk pyaas bahar-hāl miT hī jaatī hai

magar hai chiiz to aisī ki jī nahīñ bhartā

tū apne aap meñ maanā ki ek dariyā hai

mirā vajūd bhī kuuza sahī nahīñ bhartā

ye len-den kī apnī hadeñ bhī hotī haiñ

ki peT bhartā hai jholī koī nahīñ bhartā

hamārā koī bhī nemul-badal nahīñ hogā

hamārī ḳhālī jagah koī bhī nahīñ bhartā

muaaf karnā ye ḳhāka kahāñ ubhartā hai

agar ye dast-e-hunar rañg hī nahīñ bhartā

kahāñ ye 'ḳhair' kahāñ haar jiit kā ḳhadsha

ki jism o jaan kī baazī se jī nahīñ bhartā

agar anar mein wo raushni nahin bharta

to KHaksar dam-e-agahi nahin bharta

ye bhuk pyas bahar-haal miT hi jati hai

magar hai chiz to aisi ki ji nahin bharta

tu apne aap mein mana ki ek dariya hai

mera wajud bhi kuza sahi nahin bharta

ye len-den ki apni haden bhi hoti hain

ki peT bharta hai jholi koi nahin bharta

hamara koi bhi nemul-badal nahin hoga

hamari KHali jagah koi bhi nahin bharta

muaf karna ye KHaka kahan ubharta hai

agar ye dast-e-hunar rang hi nahin bharta

kahan ye 'KHair' kahan haar jit ka KHadsha

ki jism o jaan ki bazi se ji nahin bharta