agar faqir se milna hai to sambhal pahle

agar faqīr se milnā hai to sambhal pahle

amiir ban ke na jā pairahan badal pahle

paḌegī tujh pe sunahrī kiran mohabbat kī

harīm-e-zāt ke jañgal se ḳhud nikal pahle

salām kahne ko aa.egī ḳhud-baḳhud manzil

mohabbatoñ ke kaThin rāstoñ pe chal pahle

jaTā.eñ kāñch ke bande to ḳhuub haiñ lekin

tū ḳhvāhishoñ pe bhī jogī bhabhūt mal pahle

shumār terā bhī hogā kamāl vāloñ meñ

kisī kamāl ke sāñche meñ tū bhī Dhal pahle

tire payām hī se surḳh ho gayā hai badan

ki meñh paḌā nahīñ hai khil uThe kañval pahle

suḳhan-varoñ kī riyāzat pe phir gayā paanī

sunā.ī shoḳh nigāhoñ ne vo ġhazal pahle

hile na hoñT na āñkhoñ ne lab-kushā.ī kī

jabīn-e-husn pe kyuuñ paḌ ga.e haiñ bal pahle

tujhe salām kare uTh ke kis tarah 'hasrat'

tū aayā der se aur aa ga.ī ajal pahle

agar faqir se milna hai to sambhal pahle

amir ban ke na ja pairahan badal pahle

paDegi tujh pe sunahri kiran mohabbat ki

harim-e-zat ke jangal se KHud nikal pahle

salam kahne ko aaegi KHud-baKHud manzil

mohabbaton ke kaThin raston pe chal pahle

jaTaen kanch ke bande to KHub hain lekin

tu KHwahishon pe bhi jogi bhabhut mal pahle

shumar tera bhi hoga kamal walon mein

kisi kamal ke sanche mein tu bhi Dhal pahle

tere payam hi se surKH ho gaya hai badan

ki meinh paDa nahin hai khil uThe kanwal pahle

suKHan-waron ki riyazat pe phir gaya pani

sunai shoKH nigahon ne wo ghazal pahle

hile na honT na aankhon ne lab-kushai ki

jabin-e-husn pe kyun paD gae hain bal pahle

tujhe salam kare uTh ke kis tarah 'hasrat'

tu aaya der se aur aa gai ajal pahle