agar gham tera gham hai to koi gham se riha kyun ho

agar ġham terā ġham hai to koī ġham se rihā kyuuñ ho

jise hāsil ho terā qurb vo tujh se judā kyuuñ ho

ye hastī-o-adam kyuuñ ho fanā kyuuñ ho baqā kyuuñ ho

tumhīñ-tum ho to phir dil meñ ḳhayāl-e-mā-sivā kyuuñ ho

vafā meñ be-vafā.ī be-vafā.ī meñ vafā kaisī

vafā ho to jafā kyuuñ ho jafā ho to vafā kyuuñ ho

natīja kuchh nahīñ hai sham.a ke aañsū bahāne se

ye sarf-e-be-mahal āshiq kā āḳhir ḳhūñ-bahā kyuuñ ho

tumhārī bevafā.ī kyā sanad hai saarī duniyā ko

hue tum bevafā to umr merī bevafā kyuuñ ho

ḳhudā nā-karda maiñ aur kāmyābī ġhair mumkin hai

jo bar aa.e kisī sūrat vo merā mudda.ā kyuuñ ho

asar se dil ke barham kyuuñ nizām-e-dahr ho jaa.e

ham is se be-vafā kyuuñ hoñ vo ham se bā-vafā kyuuñ ho

sarāsar zulm hai is baat meñ tum se gilā merā

ridā rakkho jise tum phir vo zulm-e-nā-ravā kyuuñ ho

yahīñ tayyār haiñ jo kuchh kaho jo hukm farmāo

hamāre jurm par pābandī-e-roz-e-jazā kyuuñ ho

yahī kaafī hai marne ke liye ye bhī bahāna hai

zarūrat kyā hai āḳhir dard-e-dil us se sivā kyuuñ ho

zabāñ ḳhāmosh hai lab band haiñ himmat shikasta hai

duā se haath uThā.e haiñ to ab koī duā kyuuñ ho

maiñ khonā chāhtā huuñ madd-o-jazr-e-bahr meñ 'shaukat'

vo sāhil-āshnā kashtī kā merī nā-ḳhudā kyuuñ ho

agar gham tera gham hai to koi gham se riha kyun ho

jise hasil ho tera qurb wo tujh se juda kyun ho

ye hasti-o-adam kyun ho fana kyun ho baqa kyun ho

tumhin-tum ho to phir dil mein KHayal-e-ma-siwa kyun ho

wafa mein be-wafai be-wafai mein wafa kaisi

wafa ho to jafa kyun ho jafa ho to wafa kyun ho

natija kuchh nahin hai shama ke aansu bahane se

ye sarf-e-be-mahal aashiq ka aaKHir KHun-baha kyun ho

tumhaari bewafai kya sanad hai sari duniya ko

hue tum bewafa to umr meri bewafa kyun ho

KHuda na-karda main aur kaamyabi ghair mumkin hai

jo bar aae kisi surat wo mera muddaa kyun ho

asar se dil ke barham kyun nizam-e-dahr ho jae

hum is se be-wafa kyun hon wo hum se ba-wafa kyun ho

sarasar zulm hai is baat mein tum se gila mera

rida rakkho jise tum phir wo zulm-e-na-rawa kyun ho

yahin tayyar hain jo kuchh kaho jo hukm farmao

hamare jurm par pabandi-e-roz-e-jaza kyun ho

yahi kafi hai marne ke liye ye bhi bahana hai

zarurat kya hai aaKHir dard-e-dil us se siwa kyun ho

zaban KHamosh hai lab band hain himmat shikasta hai

dua se hath uThae hain to ab koi dua kyun ho

main khona chahta hun madd-o-jazr-e-bahr mein 'shaukat'

wo sahil-ashna kashti ka meri na-KHuda kyun ho