agar gul hai to gul jaisa mahakta kyon nahin hai

agar gul hai to gul jaisā mahaktā kyoñ nahīñ hai

vo jaisā ḳhud ko batlātā hai vaisā kyoñ nahīñ hai

kisī bhī hādse par koī rotā kyoñ nahīñ hai

agar siine meñ dil hai to dhaḌaktā kyoñ nahīñ hai

payambar amn kā kahtā thā jis ko ik zamāna

chhatoñ par ab hamārī vo parinda kyoñ nahīñ hai

hamāre dil ke bujhne kī ḳhabar ham tak hai lekin

falak par aaj raushan koī taara kyoñ nahīñ hai

mujhe ye zid maiñ apnā haal us ko kyoñ sunā.ūñ

vo merā hai to merā dukh samajhtā kyoñ nahīñ hai

diyā tum ne jalāyā hai agar insāf kā to

ujālā is kā mazlūmoñ ko miltā kyoñ nahīñ hai

jo ye sochūñ to dil āñkhoñ meñ aa jaatā hai aksar

hamārā ho kabhī vo ab hamārā kyoñ nahīñ hai

chalā karte the jis kī rahnumā.ī meñ kabhī ham

hamārī raah meñ ab vo sitārā kyoñ nahīñ hai

agar gul hai to gul jaisa mahakta kyon nahin hai

wo jaisa KHud ko batlata hai waisa kyon nahin hai

kisi bhi hadse par koi rota kyon nahin hai

agar sine mein dil hai to dhaDakta kyon nahin hai

payambar amn ka kahta tha jis ko ek zamana

chhaton par ab hamari wo parinda kyon nahin hai

hamare dil ke bujhne ki KHabar hum tak hai lekin

falak par aaj raushan koi tara kyon nahin hai

mujhe ye zid main apna haal us ko kyon sunaun

wo mera hai to mera dukh samajhta kyon nahin hai

diya tum ne jalaya hai agar insaf ka to

ujala is ka mazlumon ko milta kyon nahin hai

jo ye sochun to dil aankhon mein aa jata hai aksar

hamara ho kabhi wo ab hamara kyon nahin hai

chala karte the jis ki rahnumai mein kabhi hum

hamari rah mein ab wo sitara kyon nahin hai