agar hotin na un se chaar aankhen

agar hotīñ na un se chaar āñkheñ

to yuuñ bantīñ na mātam-dār āñkheñ

na karnā band ai bīmār āñkheñ

khulī rakhnā pa-e-dīdār āñkheñ

huiiñ saaqī se jis dam chaar āñkheñ

hamārī ho ga.iiñ sarshār āñkheñ

dil-e-shaidā ḳhayāloñ kā muraqqā

tasavvur kī alam-bardār āñkheñ

banāeñgī mire dil ko bhī bīmār

qayāmat haiñ tirī bīmār āñkheñ

nigāh-e-shauq har-sū phir rahī hai

banī haiñ ġhairat-e-parkār āñkheñ

na aa.e hosh mujh ko maiñ jo dekhūñ

kisī hushiyār kī hushiyār āñkheñ

udhar nāz-o-adā ġhārat-gar-e-hosh

idhar lene ko dil tayyār āñkheñ

tire ghar meñ tirā naqsh-e-qadam bhī

dikhātā hai mujhe har baar āñkheñ

tirī vahdat kā dil ā.īna-ḳhāna

haqīqat se haiñ vāqif-kār āñkheñ

tumhārī diid o ulfat kā maza aa.e

jo hoñ do-chār dil do-chār āñkheñ

tirī nīchī nigāheñ kah rahī haiñ

hayā kī haiñ amānat-dār āñkheñ

tire qad par tire husn-o-adā par

fidā sau baar dil sau baar āñkheñ

haqīqat meñ ye hissa hai unhīñ kā

banī haiñ husn kī haqdār āñkheñ

dil-e-shaidā shahādat de vafā kī

mohabbat kā kareñ iqrār āñkheñ

sa.mbhālo josh-e-ashk-e-ġham ko 'hāmid'

na kar deñ ishq kā iz.hār āñkheñ

agar hotin na un se chaar aankhen

to yun bantin na matam-dar aankhen

na karna band ai bimar aankhen

khuli rakhna pa-e-didar aankhen

huin saqi se jis dam chaar aankhen

hamari ho gain sarshaar aankhen

dil-e-shaida KHayalon ka muraqqa

tasawwur ki alam-bardar aankhen

banaengi mere dil ko bhi bimar

qayamat hain teri bimar aankhen

nigah-e-shauq har-su phir rahi hai

bani hain ghairat-e-parkar aankhen

na aae hosh mujh ko main jo dekhun

kisi hushiyar ki hushiyar aankhen

udhar naz-o-ada ghaarat-gar-e-hosh

idhar lene ko dil tayyar aankhen

tere ghar mein tera naqsh-e-qadam bhi

dikhata hai mujhe har bar aankhen

teri wahdat ka dil aaina-KHana

haqiqat se hain waqif-kar aankhen

tumhaari did o ulfat ka maza aae

jo hon do-chaar dil do-chaar aankhen

teri nichi nigahen kah rahi hain

haya ki hain amanat-dar aankhen

tere qad par tere husn-o-ada par

fida sau bar dil sau bar aankhen

haqiqat mein ye hissa hai unhin ka

bani hain husn ki haqdar aankhen

dil-e-shaida shahadat de wafa ki

mohabbat ka karen iqrar aankhen

sambhaalo josh-e-ashk-e-gham ko 'hamid'

na kar den ishq ka izhaar aankhen