agar irfan-e-hasti uqda-e-mushkil nahin hota

agar irfān-e-hastī uqda-e-mushkil nahīñ hotā

to phir insāniyat kā koī mustaqbil nahīñ hotā

junūn-e-shauq apne farz se ġhāfil nahīñ hotā

bhaTaktā hai magar āvāra-e-manzil nahīñ hotā

masā.ib ke sabab ye zindagī dushvār ho jaatī

agar lazzat-kash-e-dard-e-mohabbat dil nahīñ hotā

husūl-e-āfiyat be-ranj-o-mehnat jis kā maqsad ho

to vo insān duniyā meñ kisī qābil nahīñ hotā

junūn-e-shauq ne ye baat duniyā ko batā dī hai

ḳhirad kī jalva-farmā.ī jahāñ ho dil nahīñ hotā

ye taḳhlīqī madārij haiñ ki har-kāre-o-har-marde

vo nādāñ hai jo is tafrīq kā qaa.il nahīñ hotā

mashiyyat ko agar insān se koī alag samjhe

vo ahl-e-aql ho saktā hai ahl-e-dil nahīñ hotā

agar irfan-e-hasti uqda-e-mushkil nahin hota

to phir insaniyat ka koi mustaqbil nahin hota

junun-e-shauq apne farz se ghafil nahin hota

bhaTakta hai magar aawara-e-manzil nahin hota

masaib ke sabab ye zindagi dushwar ho jati

agar lazzat-kash-e-dard-e-mohabbat dil nahin hota

husul-e-afiyat be-ranj-o-mehnat jis ka maqsad ho

to wo insan duniya mein kisi qabil nahin hota

junun-e-shauq ne ye baat duniya ko bata di hai

KHirad ki jalwa-farmai jahan ho dil nahin hota

ye taKHliqi madarij hain ki har-kare-o-har-marde

wo nadan hai jo is tafriq ka qail nahin hota

mashiyyat ko agar insan se koi alag samjhe

wo ahl-e-aql ho sakta hai ahl-e-dil nahin hota