اگر عرفان ہستی عقدۂ مشکل نہیں ہوتا

اگر عرفان ہستی عقدۂ مشکل نہیں ہوتا

تو پھر انسانیت کا کوئی مستقبل نہیں ہوتا

جنون شوق اپنے فرض سے غافل نہیں ہوتا

بھٹکتا ہے مگر آوارۂ منزل نہیں ہوتا

مصائب کے سبب یہ زندگی دشوار ہو جاتی

اگر لذت کش درد محبت دل نہیں ہوتا

حصول عافیت بے رنج و محنت جس کا مقصد ہو

تو وہ انسان دنیا میں کسی قابل نہیں ہوتا

جنون شوق نے یہ بات دنیا کو بتا دی ہے

خرد کی جلوہ فرمائی جہاں ہو دل نہیں ہوتا

یہ تخلیقی مدارج ہیں کہ ہرکارے و ہر مردے

وہ ناداں ہے جو اس تفریق کا قائل نہیں ہوتا

مشیت کو اگر انسان سے کوئی الگ سمجھے

وہ اہل عقل ہو سکتا ہے اہل دل نہیں ہوتا