agar na dard se is dil ko aashna karte

agar na dard se is dil ko āshnā karte

ġham-e-hayāt kā kis tarah tajziyā karte

ḳhudā-na-ḳhvāsta kashtī jo Dūbne lagtī

sivā ḳhudā ke bhalā kyā ye nāḳhudā karte

ajab nahīñ thā ki aa jaatā hosh meñ bīmār

qarīb aa ke jo dāman se vo havā karte

kaTī tasavvur-e-hūrān-e-ḳhuld meñ jin kī

hamāre un ke bhalā kyā vo tasfiya karte

ham aise riñd pas-e-marg bhī vahāñ jaate

na piinā jurm ho hukaman jahāñ piyā karte

saḳhī ke sāmne phaile hue haiñ jin ke haath

ham aise logoñ se kyā arz-e-mudda.ā karte

ye dard-e-dil to hai is zindagī kā mutarādif

maraz agar koī hotā to kuchh davā karte

na hote dil se jo majbūr kar ke tark-e-vafā

use bhī ham zarā taḌpā ke tajraba karte

tunak-mizājī-e-ḳhūbāñ kā gar patā hotā

manāte phir unheñ pahle to ham ḳhafā karte

ga.e haiñ dair-o-haram ho ke lā-makāñ kī taraf

qayām rahrav-e-manzil yuuñ jā-ba-jā karte

uThāyā maslahatan ham ne ḳhuun kā da.avā

kisī kī aañkh sar-e-hashr nīchī kyā karte

na pās-e-laġhzish-e-ādam agar hameñ hotā

ilaaj terā bhī ai dev-e-ishtihā karte

na hotī apne parā.e kī phir hameñ tam.īz

daġhā na mil ke agar yaar āshnā karte

niyāz-o-nāz na yuuñ hote lāzim-o-malzūm

na yuuñ kisī ke ishāroñ pe ham chalā karte

darūn-e-dil kī sadā hai magar ġhazal 'māhir'

ki sher sher pe sāme.a haiñ vāh-vā karte

agar na dard se is dil ko aashna karte

gham-e-hayat ka kis tarah tajziya karte

KHuda-na-KHwasta kashti jo Dubne lagti

siwa KHuda ke bhala kya ye naKHuda karte

ajab nahin tha ki aa jata hosh mein bimar

qarib aa ke jo daman se wo hawa karte

kaTi tasawwur-e-huran-e-KHuld mein jin ki

hamare un ke bhala kya wo tasfiya karte

hum aise rind pas-e-marg bhi wahan jate

na pina jurm ho hukaman jahan piya karte

saKHi ke samne phaile hue hain jin ke hath

hum aise logon se kya arz-e-muddaa karte

ye dard-e-dil to hai is zindagi ka mutaradif

maraz agar koi hota to kuchh dawa karte

na hote dil se jo majbur kar ke tark-e-wafa

use bhi hum zara taDpa ke tajraba karte

tunak-mizaji-e-KHuban ka gar pata hota

manate phir unhen pahle to hum KHafa karte

gae hain dair-o-haram ho ke la-makan ki taraf

qayam rahraw-e-manzil yun ja-ba-ja karte

uThaya maslahatan hum ne KHun ka dawa

kisi ki aankh sar-e-hashr nichi kya karte

na pas-e-laghzish-e-adam agar hamein hota

ilaj tera bhi ai dew-e-ishtiha karte

na hoti apne parae ki phir hamein tamiz

dagha na mil ke agar yar aashna karte

niyaz-o-naz na yun hote lazim-o-malzum

na yun kisi ke ishaaron pe hum chala karte

darun-e-dil ki sada hai magar ghazal 'mahir'

ki sher sher pe samea hain wah-wa karte