agar qadam tere mai-kash ka laDkhaDa jae

agar qadam tire mai-kash kā laḌkhaḌā jaa.e

to sham-e-mai-kada kī lau bhī thartharā jaa.e

ab is maqām pe laa.ī hai zindagī mujh ko

ki chāhtā huuñ tujhe bhī bhulā diyā jaa.e

mujhe bhī yuuñ to baḌī aarzū hai jiine kī

magar savāl ye hai kis tarah jiyā jaa.e

ġham-e-hayāt se itnī bhī hai kahāñ fursat

ki terī yaad meñ jī bhar ke ro liyā jaa.e

unheñ bhī bhuul chukā huuñ maiñ ai ġham-e-daurāñ

ab is ke ba.ad batā aur kyā kiyā jaa.e

na jaane ab ye mujhe kyuuñ ḳhayāl aatā hai

ki apne haal pe be-sāḳhta hañsā jaa.e

gurez ishq se lāzim sahī magar 'rif.at'

jo dil hī baat na maane to kyā kiyā jaa.e

agar qadam tere mai-kash ka laDkhaDa jae

to sham-e-mai-kada ki lau bhi tharthara jae

ab is maqam pe lai hai zindagi mujh ko

ki chahta hun tujhe bhi bhula diya jae

mujhe bhi yun to baDi aarzu hai jine ki

magar sawal ye hai kis tarah jiya jae

gham-e-hayat se itni bhi hai kahan fursat

ki teri yaad mein ji bhar ke ro liya jae

unhen bhi bhul chuka hun main ai gham-e-dauran

ab is ke baad bata aur kya kiya jae

na jaane ab ye mujhe kyun KHayal aata hai

ki apne haal pe be-saKHta hansa jae

gurez ishq se lazim sahi magar 'rifat'

jo dil hi baat na mane to kya kiya jae