agar sab sach ke matwale hue hain

agar sab sach ke matvāle hue haiñ

zabāñ par qufl kyoñ Daale hue haiñ

sunā hai choriyāñ ho jā.eñgī band

ki ab rahzan hī rakhvāle hue haiñ

ġhubār-ālūd hai fasl-e-bahārāñ

gul-e-ḳhush-rang maTiyāle hue haiñ

ik an-jānā sā Dar hai dil pe taarī

ki dushman ab to ghar vaale hue haiñ

saroñ kī hai zarūrat vaqt ko phir

buland har samt se bhāle hue haiñ

pahāḌ apnī jagah qaa.em haiñ ab tak

qayāmat ko abhī Taale hue haiñ

mujhe bhī ho bashārat manziloñ kī

mire paañv meñ bhī chhāle hue haiñ

javāz-e-ḳhauf kyā ho ab 'tasavvur'

inhī hālāt ke paale hue haiñ

agar sab sach ke matwale hue hain

zaban par qufl kyon Dale hue hain

suna hai choriyan ho jaengi band

ki ab rahzan hi rakhwale hue hain

ghubar-alud hai fasl-e-bahaaran

gul-e-KHush-rang maTiyale hue hain

ek an-jaana sa Dar hai dil pe tari

ki dushman ab to ghar wale hue hain

saron ki hai zarurat waqt ko phir

buland har samt se bhaale hue hain

pahaD apni jagah qaem hain ab tak

qayamat ko abhi Tale hue hain

mujhe bhi ho bashaarat manzilon ki

mere panw mein bhi chhaale hue hain

jawaz-e-KHauf kya ho ab 'tasawwur'

inhi haalat ke pale hue hain