agar shane pe din ke raat ka parcham nahin hota

agar shāne pe din ke raat kā parcham nahīñ hotā

ye aalam kuchh bhī hotā ḳhushnumā aalam nahīñ hotā

kisī sūrat Tapaktā zaḳhm dil kā kam nahīñ hotā

ye zaḳhm-e-dil hai ye minnat-kash-e-marham nahīñ hotā

masarrat se masarrat aur ġham se ġham nahīñ hotā

ajab hotā hai aalam jab koī aalam nahīñ hotā

bharosa nāḳhudā pe karne vaalā Duub jaatā hai

pukāre jo ḳhudā ko ġharq-e-mauj-e-yam nahīñ hotā

shahādat paa.ī hai dil ne fidā-e-gul-ruḳhāñ ho kar

shahīdoñ kā hamāre diin meñ mātam nahīñ hotā

zahe-qismat ki āġhosh-e-haram hai aur ham varna

gunāhoñ kā sila to sāġhar-e-zamzam nahīñ hotā

'na.īm' apnā liyā hai ham ne ġham saare zamāne kā

ki jab had se guzar jaatā hai ġham phir ġham nahīñ hotā

agar shane pe din ke raat ka parcham nahin hota

ye aalam kuchh bhi hota KHushnuma aalam nahin hota

kisi surat Tapakta zaKHm dil ka kam nahin hota

ye zaKHm-e-dil hai ye minnat-kash-e-marham nahin hota

masarrat se masarrat aur gham se gham nahin hota

ajab hota hai aalam jab koi aalam nahin hota

bharosa naKHuda pe karne wala Dub jata hai

pukare jo KHuda ko gharq-e-mauj-e-yam nahin hota

shahadat pai hai dil ne fida-e-gul-ruKHan ho kar

shahidon ka hamare din mein matam nahin hota

zahe-qismat ki aaghosh-e-haram hai aur hum warna

gunahon ka sila to saghar-e-zamzam nahin hota

'naim' apna liya hai hum ne gham sare zamane ka

ki jab had se guzar jata hai gham phir gham nahin hota