اگر ترک تعلق کر بھی لیتے ہم تو کیا ہوتا

اگر ترک تعلق کر بھی لیتے ہم تو کیا ہوتا

کہاں ممکن کہ دل قید محبت سے رہا ہوتا

چلو اچھا ہوا تم نے بھی آخر دشمنی کر لی

کہاں تک تم سے آخر دوستی کا حق ادا ہوتا

غنیمت ہے یہ دل جیسا بھی ہے رونق ہے ہستی کی

اندھیرا چھا گیا ہوتا اگر دل بجھ گیا ہوتا

مجھے ساحل پہ پہنچایا مری خود اعتمادی نے

یہ کشتی ڈوب جاتی ساتھ میں گر ناخدا ہوتا

مبارک ہو تمہیں جشن چراغاں دوستو لیکن

کسی مفلس کے گھر کو بھی کوئی ٹوٹا دیا ہوتا

غریبی بھوک ظلم و جور کیسے دیکھ سکتا میں

خدائی بھی نہ مجھ کو راس آتی گر خدا ہوتا