agar ye zid hai ki mujhse dua salam na ho

agar ye zid hai ki mujh se duā salām na ho

to aisī raah se guzro jo rāh-e-ām na ho

sunā to hai ki mohabbat pe log marte haiñ

ḳhudā kare ki mohabbat tumhārā naam na ho

bahār-e-āriz-e-gulgūñ tujhe ḳhudā kī qasam

vo sub.h mere liye bhī ki jis kī shaam na ho

mire sukūt ko nafrat se dekhne vaale

yahī sukūt kahīñ bā.is-e-kalām na ho

ilāhī ḳhair ki un kā salām aayā hai

yahī salām kahīñ āḳhirī salām na ho

mujhe to raas na aa.ī hayāt-e-nau lekin

ḳhatā-muāf tumhārā bhī ye maqām na ho

'jamīl' un se ta.āruf to ho gayā lekin

ab un ke baad kisī se duā salām na ho

agar ye zid hai ki mujh se dua salam na ho

to aisi rah se guzro jo rah-e-am na ho

suna to hai ki mohabbat pe log marte hain

KHuda kare ki mohabbat tumhaara nam na ho

bahaar-e-ariz-e-gulgun tujhe KHuda ki qasam

wo subh mere liye bhi ki jis ki sham na ho

mere sukut ko nafrat se dekhne wale

yahi sukut kahin bais-e-kalam na ho

ilahi KHair ki un ka salam aaya hai

yahi salam kahin aaKHiri salam na ho

mujhe to ras na aai hayat-e-nau lekin

KHata-muaf tumhaara bhi ye maqam na ho

'jamil' un se taaruf to ho gaya lekin

ab un ke baad kisi se dua salam na ho