agarche tujhse bahut iKHtilaf bhi na hua

agarche tujh se bahut iḳhtilāf bhī na huā

magar ye dil tirī jānib se saaf bhī na huā

ta.alluqāt ke barzaḳh meñ hī rakhā mujh ko

vo mere haq meñ na thā aur ḳhilāf bhī na huā

ajab thā jurm-e-mohabbat ki jis pe dil ne mire

sazā bhī paa.ī nahīñ aur muaaf bhī na huā

malāmatoñ meñ kahāñ saañs le sakeñge vo log

ki jin se kū-e-jafā kā tavāf bhī na huā

ajab nahīñ hai ki dil par jamī milī kaa.ī

bahut dinoñ se to ye hauz saaf bhī na huā

havā-e-dahr hameñ kis liye bujhātī hai

hameñ to tujh se kabhī iḳhtilāf bhī na huā

agarche tujh se bahut iKHtilaf bhi na hua

magar ye dil teri jaanib se saf bhi na hua

talluqat ke barzaKH mein hi rakha mujh ko

wo mere haq mein na tha aur KHilaf bhi na hua

ajab tha jurm-e-mohabbat ki jis pe dil ne mere

saza bhi pai nahin aur muaf bhi na hua

malamaton mein kahan sans le sakenge wo log

ki jin se ku-e-jafa ka tawaf bhi na hua

ajab nahin hai ki dil par jami mili kai

bahut dinon se to ye hauz saf bhi na hua

hawa-e-dahr hamein kis liye bujhati hai

hamein to tujh se kabhi iKHtilaf bhi na hua