agarche usne likha hua hai jahan-e-fani mein mar dena

agarche us ne likhā huā hai jahān-e-fānī meñ maar denā

makān vaale se iltijā hai ki lā-makānī meñ maar denā

mire azīzo maiñ jā rahā huuñ mirī vasiyyat ko yaad rakhnā

jo mujh sā koī bhī ek dekho use javānī meñ maar denā

mujhe hai ma.alūm ai musannif ki merā kirdār sānvī hai

jahāñ izāfī lage tumheñ ye mujhe kahānī meñ maar denā

maiñ jāntā huuñ ki zo.af-e-pīrī to chhīn letā hai bolnā bhī

zabāñ meñ luknat se peshtar hī mujhe ravānī meñ maar denā

unheñ buḌhāpe meñ chhoḌnā mat nahīf ḳhvāboñ ko toḌnā mat

za.iif maañ baap ko na tum un kī zindagānī meñ maar denā

mujhe tumhāre sitam kī nisbat karam tumhārā azīz-tar hai

so dasht-e-ġham se bachā ke sahrā-e-mehrbānī meñ maar denā

agar ye Dar hai ki āstīñ par mire lahū ke nishān hoñge

tumheñ suhūlat maiñ de rahā huuñ ki mujh ko paanī meñ maar denā

sabhī mohabbat kī baat karte haiñ maiñ mohabbat nibhā rahā huuñ

so mārnā ho to apne 'dānish' ko jurm-e-sānī meñ maar denā

agarche us ne likha hua hai jahan-e-fani mein mar dena

makan wale se iltija hai ki la-makani mein mar dena

mere azizo main ja raha hun meri wasiyyat ko yaad rakhna

jo mujh sa koi bhi ek dekho use jawani mein mar dena

mujhe hai malum ai musannif ki mera kirdar sanwi hai

jahan izafi lage tumhein ye mujhe kahani mein mar dena

main jaanta hun ki zoaf-e-piri to chhin leta hai bolna bhi

zaban mein luknat se peshtar hi mujhe rawani mein mar dena

unhen buDhape mein chhoDna mat nahif KHwabon ko toDna mat

zaif man bap ko na tum un ki zindagani mein mar dena

mujhe tumhaare sitam ki nisbat karam tumhaara aziz-tar hai

so dasht-e-gham se bacha ke sahra-e-mehrbani mein mar dena

agar ye Dar hai ki aastin par mere lahu ke nishan honge

tumhein suhulat main de raha hun ki mujh ko pani mein mar dena

sabhi mohabbat ki baat karte hain main mohabbat nibha raha hun

so marna ho to apne 'danish' ko jurm-e-sani mein mar dena