ahd-e-piri ne hamein rang dikhae kya kya

ahd-e-pīrī ne hameñ rañg dikhā.e kyā kyā

sar pe ho shaam to baḌh jaate haiñ saa.e kyā kyā

Thokareñ lagne lagīñ zo.af-e-basārat ke sabab

dekhiye zo.af-e-samā.at bhī dikhā.e kyā kyā

tark ulfat kī kabhī aur kabhī tark mai kī

ab to ahbāb bhī dene lage raa.e kyā kyā

vaa.e nādānī-e-dil is ne mohabbat kar ke

ranj-o-ġham mol liye baiThe-biThā.e kyā kyā

ḳhud ko rusvā kiyā har raaz chhupā kar us kā

apne sar le liye ilzām parā.e kyā kyā

aish-o-ishrat se sadā kaam javānī meñ rahā

sher-o-naġhma se shab-o-roz sajā.e kyā kyā

sāya-e-zulf kabhī aur kabhī dāman kī havā

us ke altāf-o-karam yaad na aa.e kyā kyā

fikr-e-uqbā se larazte haiñ ab a.asāb-e-'tamīz'

dekhiye fard-e-amal sāmne laa.e kyā kyā

ahd-e-piri ne hamein rang dikhae kya kya

sar pe ho sham to baDh jate hain sae kya kya

Thokaren lagne lagin zoaf-e-basarat ke sabab

dekhiye zoaf-e-samaat bhi dikhae kya kya

tark ulfat ki kabhi aur kabhi tark mai ki

ab to ahbab bhi dene lage rae kya kya

wae nadani-e-dil is ne mohabbat kar ke

ranj-o-gham mol liye baiThe-biThae kya kya

KHud ko ruswa kiya har raaz chhupa kar us ka

apne sar le liye ilzam parae kya kya

aish-o-ishrat se sada kaam jawani mein raha

sher-o-naghma se shab-o-roz sajae kya kya

saya-e-zulf kabhi aur kabhi daman ki hawa

us ke altaf-o-karam yaad na aae kya kya

fikr-e-uqba se larazte hain ab aasab-e-'tamiz'

dekhiye fard-e-amal samne lae kya kya