ahl-e-danish ki nigahon mein hadaf koi nahin

ahl-e-dānish kī nigāhoñ meñ hadaf koī nahīñ

sar to ab bhī hai magar sang-ba-kaf koī nahīñ

halqa-e-kam-nazarāñ ‘āqibat-andesh na thā

maiñ usī raah gayā jis kī taraf koī nahīñ

dā'vā-e-nām-o-nasab sab kī zabāñ se jaarī

vāqi'a ye hai ki pāband-e-salaf koī nahīñ

ḳhud-nigah-dārī kī pādāsh meñ rusvā hue ham

hāsil is kaam meñ to izz-o-sharaf koī nahīñ

pī bhī letā huuñ jo mā.il-ba-karam ho vo nigāh

varna is ḳhaak ke putle ko shaġhaf koī nahīñ

'anjum' ab ahl-e-zamāna se tavaqqo' kaisī

abr-e-naisāñ ke muqaddar meñ sadaf koī nahīñ

ahl-e-danish ki nigahon mein hadaf koi nahin

sar to ab bhi hai magar sang-ba-kaf koi nahin

halqa-e-kam-nazaran ‘aqibat-andesh na tha

main usi rah gaya jis ki taraf koi nahin

da'wa-e-nam-o-nasab sab ki zaban se jari

waqi'a ye hai ki paband-e-salaf koi nahin

KHud-nigah-dari ki padash mein ruswa hue hum

hasil is kaam mein to izz-o-sharaf koi nahin

pi bhi leta hun jo mail-ba-karam ho wo nigah

warna is KHak ke putle ko shaghaf koi nahin

'anjum' ab ahl-e-zamana se tawaqqo' kaisi

abr-e-naisan ke muqaddar mein sadaf koi nahin