ai ahl-e-mohabbat kya kahiye kya chiz mohabbat hoti hai

ai ahl-e-mohabbat kyā kahiye kyā chiiz mohabbat hotī hai

kuchh ġham kī haqīqat hotī hai kuchh dil kī tabī.at hotī hai

kul ziist alam tā-zīst alam yak vaqfa-e-dam taskīn-e-alam

sunte haiñ qayāmat aatī hai jab us se bhī fursat hotī hai

uf āyat-e-sajda husn-e-adā jalve ke liye parda bhī uThā

betāb jabīñ jhuk jaatī hai kuchh aisī bhī sūrat hotī hai

kuchh mast nigāh-e-sāqī hai kul mai meñ hai jo kuchh baaqī hai

mai-ḳhāne ke bāhar kuchh bhī nahīñ mai-ḳhāne meñ jannat hotī hai

duniyā se alag ho kar 'kaifī' duniyā se ḳhafā duniyā kā gila

ummīd agar baaqī na rahe tab yaas meñ rāhat hotī hai

ai ahl-e-mohabbat kya kahiye kya chiz mohabbat hoti hai

kuchh gham ki haqiqat hoti hai kuchh dil ki tabiat hoti hai

kul zist alam ta-zist alam yak waqfa-e-dam taskin-e-alam

sunte hain qayamat aati hai jab us se bhi fursat hoti hai

uf aayat-e-sajda husn-e-ada jalwe ke liye parda bhi uTha

betab jabin jhuk jati hai kuchh aisi bhi surat hoti hai

kuchh mast nigah-e-saqi hai kul mai mein hai jo kuchh baqi hai

mai-KHane ke bahar kuchh bhi nahin mai-KHane mein jannat hoti hai

duniya se alag ho kar 'kaifi' duniya se KHafa duniya ka gila

ummid agar baqi na rahe tab yas mein rahat hoti hai