اے بلبل صحرا چمنستان میں آ دیکھ

اے بلبل صحرا چمنستان میں آ دیکھ

کلیوں کے نئے ڈھب سے چٹکنے کی ادا دیکھ

فرعون صفت ہونٹوں پہ ہارون بیانی

اور اس پہ بھی خاموش ہے موسیٰ کا خدا دیکھ

پھر بیعت کم ظرف محبت سے ہے مطلوب

سجنے کو ہے پھر ایک نئی کرب و بلا دیکھ

اے رب زلیخا و خدائے ابو یوسف

اک حسن کے مارے ہوئے دو ہجر زدہ دیکھ

میں تیرا پرستار ہوں اور تجھ سے خفا ہوں

اٹھنے کے نہیں اب سے مرے دست دعا دیکھ

جس شام کو برسوں کی توجہ نے سنوارا

اس شام کے پہلو میں ہی کچھ ٹوٹ گیا دیکھ

دم توڑ رہی لو کے انا پوش محافظ

کر دے گی برہنہ تجھے اک روز ہوا دیکھ