ai dil batā ye un kī navāzish hai yā nahīñ
vo dard mil gayā hai ki jis kī davā nahīñ
ḳhush-fahmiyoñ ko dil ne farāmosh kar diyā
ye aur baat hai ki tumheñ bhūlnā nahīñ
mā.ūf kar diyā hai ġhamoñ ne dil-o-dimāġh
ab to hameñ ḳhayāl kisī baat kā nahīñ
zabt-e-alam pe harf na aane diyā kabhī
āñkhoñ se ek ashk bhī ab tak girā nahīñ
maujoñ ko kyā ḳhabar hai jo haiñ sat.h-e-āb par
dariyā meñ jo chhupā hai vo tūfāñ uThā nahīñ
nairangi-e-jahāñ kā kahāñ tak mushāhida
ai fursat-e-nigāh tirā jī bharā nahīñ
ye ziist kā safar bhī 'munavār' ajiib hai
manzil hai kitnī duur hameñ kuchh patā nahīñ
ai dil bata ye un ki nawazish hai ya nahin
wo dard mil gaya hai ki jis ki dawa nahin
KHush-fahmiyon ko dil ne faramosh kar diya
ye aur baat hai ki tumhein bhulna nahin
mauf kar diya hai ghamon ne dil-o-dimagh
ab to hamein KHayal kisi baat ka nahin
zabt-e-alam pe harf na aane diya kabhi
aankhon se ek ashk bhi ab tak gira nahin
maujon ko kya KHabar hai jo hain sath-e-ab par
dariya mein jo chhupa hai wo tufan uTha nahin
nairangi-e-jahan ka kahan tak mushahida
ai fursat-e-nigah tera ji bhara nahin
ye zist ka safar bhi 'munawar' ajib hai
manzil hai kitni dur hamein kuchh pata nahin
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
