ai dil-e-KHud-na-shanas aisa bhi kya

ai dil-e-ḳhud-nā-shanās aisā bhī kyā

ā.īna aur is qadar andhā bhī kyā

us ko dekhā bhī magar dekhā bhī kyā

arsa-e-ḳhvāhish meñ ik lamha bhī kyā

dard kā rishta bhī hai tujh se bahut

aur phir ye dard kā rishta bhī kyā

zindagī ḳhud laakh zahroñ kā thī zahr

zahr-e-ġham tujh se mirā hotā bhī kyā

pūchhtā hai rāh-rau se ye sarāb

tishnagī kā naam hai dariyā bhī kyā

khīñchtī hai aql jab koī hisār

dhuup kahtī hai ki ye saaya bhī kyā

uf ye lau detī huī tanhā.iyāñ

shahr meñ ābād hai sahrā bhī kyā

ḳhud use darkār thī merī nazar

ḳhud-numā jalva mujhe detā bhī kyā

raqs karnā har na.e jhoñke ke saath

barg-e-āvāra hai ye duniyā bhī kyā

ḳhanda-zan ġham par ḳhushī par ashk-bār

in dinoñ yaaro hai rañg apnā bhī kyā

be-tab-o-tāb-e-shuā-e-āgahī

ishq kahiye jis ko vo sho.ala bhī kyā

gaahe gaahe pyaar kī bhī ik nazar

ham se rūThe hī raho aisā bhī kyā

ai mirī taḳhlīq-e-fan tere baġhair

maiñ ki sab kuchh thā magar maiñ thā bhī kyā

naġhma-e-jāñ ko girāñ-goshoñ ke paas

nā-rasā.ī ke sivā miltā bhī kyā

ai dil-e-KHud-na-shanas aisa bhi kya

aaina aur is qadar andha bhi kya

us ko dekha bhi magar dekha bhi kya

arsa-e-KHwahish mein ek lamha bhi kya

dard ka rishta bhi hai tujh se bahut

aur phir ye dard ka rishta bhi kya

zindagi KHud lakh zahron ka thi zahr

zahr-e-gham tujh se mera hota bhi kya

puchhta hai rah-rau se ye sarab

tishnagi ka nam hai dariya bhi kya

khinchti hai aql jab koi hisar

dhup kahti hai ki ye saya bhi kya

uf ye lau deti hui tanhaiyan

shahr mein aabaad hai sahra bhi kya

KHud use darkar thi meri nazar

KHud-numa jalwa mujhe deta bhi kya

raqs karna har nae jhonke ke sath

barg-e-awara hai ye duniya bhi kya

KHanda-zan gham par KHushi par ashk-bar

in dinon yaro hai rang apna bhi kya

be-tab-o-tab-e-shua-e-agahi

ishq kahiye jis ko wo shoala bhi kya

gahe gahe pyar ki bhi ek nazar

hum se ruThe hi raho aisa bhi kya

ai meri taKHliq-e-fan tere baghair

main ki sab kuchh tha magar main tha bhi kya

naghma-e-jaan ko giran-goshon ke pas

na-rasai ke siwa milta bhi kya