ai dil na aqida hai dawa par na dua par

ai dil na 'aqīda hai davā par na du'ā par

kam-baḳht tujhe chhoḌ diyā ham ne ḳhudā par

is tarah sunī 'ishq meñ nāseh kī har ik baat

parhez kyā karte haiñ jis tarah davā par

ab tak to kabhī be-mai-o-ma.ashūq na guzrī

ā.inda razā-mand huuñ mālik kī razā par

itne to gunahgār haiñ badnām-e-mohabbat

āñkheñ to malī haiñ tire naqsh-e-kaf-e-pā par

dil lene ke andāz kā kuchh naam nahīñ hai

mauqūf hai ye chiiz adā par na hayā par

allāh mujhe kam se kam itnā to banā de

ek ek to dil duuñ tirī ek ek adā par

dekheñ tire kūche kī zarā āb-o-havā bhī

chalte haiñ jo paanī pe jo uḌte havā par

aaj aap ko dekhā magar ab tak to sunā thā

qaa.il nahīñ hotā kabhī insān ḳhatā par

mā'lūm nahīñ kaun sī miTTī se bane haiñ

vo log jo ġhash haiñ tire naqsh-e-kaf-e-pā par

ham apne ḳhayālāt kī islāh kareñge

koshish to bahut kī hai bharosa hai ḳhudā par

hotā huuñ tirī shān-e-karīmī ke tasadduq

marne ke liye hote haiñ chyūñTī ko 'atā par

ai dost farāmosh ye hai haal hamārā

āmīn kahā karte haiñ dushman kī du'ā par

kyā aah se armān nikalte haiñ kisī ke

pul bāñdhte haiñ bāñdhne vaale to havā par

taklīf hamesha dil-e-ḳhud-sar ne uThā.ī

aa.ī haiñ balā.eñ bahut us ek balā par

allāh ne kyā kyā tire muñh se na sunāyā

ham shukr bhī karte haiñ shikāyat kī binā par

taakā thā mujhe aur chhiddā ġhair kā siina

ai vaah nikāle haiñ tire tiir ne kyā par

'āshiq huuñ to kyā aap kī sohbat meñ rahā huuñ

hañsnā hī paḌegā mire rone kī adā par

vo kaun haiñ maiñ kaun huuñ kyā muñh se nikālūñ

mansūr ko suulī milī aisī hī ḳhatā par

aise tire 'āshiq kabhī dekhe na sune the

pahre to biThā.e nahīñ naqsh-e-kaf-e-pā par

'ushshāq se bhūle kahīñ dekhe bhī haiñ tum ne

mar miTte haiñ ye log faqat nām-e-vafā par

tum se to 'safī' ne faqat ik Dhoñg kiyā hai

khātā hai na piitā hai to jiitā hai havā par

ai dil na 'aqida hai dawa par na du'a par

kam-baKHt tujhe chhoD diya hum ne KHuda par

is tarah suni 'ishq mein naseh ki har ek baat

parhez kya karte hain jis tarah dawa par

ab tak to kabhi be-mai-o-mashuq na guzri

aainda raza-mand hun malik ki raza par

itne to gunahgar hain badnam-e-mohabbat

aankhen to mali hain tere naqsh-e-kaf-e-pa par

dil lene ke andaz ka kuchh nam nahin hai

mauquf hai ye chiz ada par na haya par

allah mujhe kam se kam itna to bana de

ek ek to dil dun teri ek ek ada par

dekhen tere kuche ki zara aab-o-hawa bhi

chalte hain jo pani pe jo uDte hawa par

aaj aap ko dekha magar ab tak to suna tha

qail nahin hota kabhi insan KHata par

ma'lum nahin kaun si miTTi se bane hain

wo log jo ghash hain tere naqsh-e-kaf-e-pa par

hum apne KHayalat ki islah karenge

koshish to bahut ki hai bharosa hai KHuda par

hota hun teri shan-e-karimi ke tasadduq

marne ke liye hote hain chyunTi ko 'ata par

ai dost faramosh ye hai haal hamara

aamin kaha karte hain dushman ki du'a par

kya aah se arman nikalte hain kisi ke

pul bandhte hain bandhne wale to hawa par

taklif hamesha dil-e-KHud-sar ne uThai

aai hain balaen bahut us ek bala par

allah ne kya kya tere munh se na sunaya

hum shukr bhi karte hain shikayat ki bina par

taka tha mujhe aur chhidda ghair ka sina

ai wah nikale hain tere tir ne kya par

'ashiq hun to kya aap ki sohbat mein raha hun

hansna hi paDega mere rone ki ada par

wo kaun hain main kaun hun kya munh se nikalun

mansur ko suli mili aisi hi KHata par

aise tere 'ashiq kabhi dekhe na sune the

pahre to biThae nahin naqsh-e-kaf-e-pa par

'ushshaq se bhule kahin dekhe bhi hain tum ne

mar miTte hain ye log faqat nam-e-wafa par

tum se to 'safi' ne faqat ek Dhong kiya hai

khata hai na pita hai to jita hai hawa par