ai dil tere tufail jo mujh par sitam hue

ai dil tire tufail jo mujh par sitam hue

pūchhe jo mujh se koī to kah duuñ ki kam hue

mere charāġh-e-zehn ko vo gul na kar sake

hālāñki sab añdhere mire dil meñ zam hue

harf-e-ġhazab se bhī hameñ mahrūm kar diyā

yuuñ be-niyāz ham se hamāre sanam hue

un kī zamīn-e-dil kā to qissa hī aur hai

varna un āñsuoñ se to sahrā bhī nam hue

ahbāb ne to rāste DhūñDe the muḳhtalif

lekin sab aa ke merī hī rāhoñ meñ zam hue

rabt-e-dilī se ḳhalq ko ab vāsta kahāñ

ab to hamā-shumā bhī asīr-e-manam hue

'arshad' fasīl-e-zehn meñ baḌhne lagā jo habs

ham shahr-e-dil meñ jā ke zarā tāza-dam hue

ai dil tere tufail jo mujh par sitam hue

puchhe jo mujh se koi to kah dun ki kam hue

mere charagh-e-zehn ko wo gul na kar sake

haalanki sab andhere mere dil mein zam hue

harf-e-ghazab se bhi hamein mahrum kar diya

yun be-niyaz hum se hamare sanam hue

un ki zamin-e-dil ka to qissa hi aur hai

warna un aansuon se to sahra bhi nam hue

ahbab ne to raste DhunDe the muKHtalif

lekin sab aa ke meri hi rahon mein zam hue

rabt-e-dili se KHalq ko ab wasta kahan

ab to hama-shuma bhi asir-e-manam hue

'arshad' fasil-e-zehn mein baDhne laga jo habs

hum shahr-e-dil mein ja ke zara taza-dam hue