ai dil ye sai-e-zabt kahin raegan na ho

ai dil ye sa.ī-e-zabt kahīñ rā.egāñ na ho

Dartā huuñ phir vo dushman-e-jāñ mehrbāñ na ho

koī batā.e aisī nazar ko maiñ kyā kahūñ

jo raunaq-e-hayāt ho taskīn-e-jāñ na ho

be-iḳhtiyār jhukne lagī kyoñ jabīn-e-shauq

us dushman-e-vafā kā yahī āstāñ na ho

chheḌā hai maiñ ne qissa-e-mūsā-o-koh-e-tūr

us ko hai vahm ye bhī mirī dāstāñ na ho

hairāñ huuñ kaise chashm-e-tamannā ne kī bayāñ

vo ek kaifiyat jo rahīn-e-bayāñ na ho

maiñ aur us nigāh-e-karam par na jaañ duuñ

ye vahm thā ki vo bhī pa-e-imtihāñ na ho

ḳhvāhish ye hai ki nazr karūñ ye matā-e-dil

phir sochtā huuñ ek nazar kā ziyāñ na ho

hai ik adā-e-husn hijāb-e-nazar-faroz

is parda-e-bahār meñ koī nihāñ na ho

mahrūmiyoñ ne ranj ko rāhat banā diyā

ab talḳhī-e-hayāt bhī shāyad girāñ na ho

ai dil ye sai-e-zabt kahin raegan na ho

Darta hun phir wo dushman-e-jaan mehrban na ho

koi batae aisi nazar ko main kya kahun

jo raunaq-e-hayat ho taskin-e-jaan na ho

be-iKHtiyar jhukne lagi kyon jabin-e-shauq

us dushman-e-wafa ka yahi aastan na ho

chheDa hai main ne qissa-e-musa-o-koh-e-tur

us ko hai wahm ye bhi meri dastan na ho

hairan hun kaise chashm-e-tamanna ne ki bayan

wo ek kaifiyat jo rahin-e-bayan na ho

main aur us nigah-e-karam par na jaan dun

ye wahm tha ki wo bhi pa-e-imtihan na ho

KHwahish ye hai ki nazr karun ye mata-e-dil

phir sochta hun ek nazar ka ziyan na ho

hai ek ada-e-husn hijab-e-nazar-faroz

is parda-e-bahaar mein koi nihan na ho

mahrumiyon ne ranj ko rahat bana diya

ab talKHi-e-hayat bhi shayad giran na ho