ai dost! teri aankh jo nam hai to mujhe kya

ai dost! tirī aañkh jo nam hai to mujhe kyā

maiñ ḳhuub hañsūñgā tujhe ġham hai to mujhe kyā

kyā maiñ ne kahā thā ki zamāne se bhalā kar

ab tū bhī sazāvār-e-sitam hai to mujhe kyā

haañ le le qasam gar mujhe qatra bhī milā ho

tū shākī-e-arbāb-e-karam hai to mujhe kyā

jis dar se nadāmat ke sivā kuchh nahīñ miltā

us dar pe tirā sar bhī jo ḳham hai to mujhe kyā

maiñ ne to pukārā hai mohabbat ke ufaq se

raste meñ tire sañg-e-haram hai to mujhe kyā

bhūlā to na hogā tujhe suqrāt kā anjām

hāthoñ meñ tire sāġhar-e-sam hai to mujhe kyā

patthar na paḌeñ gar sar-e-bāzār to kahnā

tū motarif-e-husn-e-sanam hai to mujhe kyā

maiñ sarmad o mansūr banā huuñ tirī ḳhātir

ye bhī tirī ummīd se kam hai to mujhe kyā

ai dost! teri aankh jo nam hai to mujhe kya

main KHub hansunga tujhe gham hai to mujhe kya

kya main ne kaha tha ki zamane se bhala kar

ab tu bhi sazawar-e-sitam hai to mujhe kya

han le le qasam gar mujhe qatra bhi mila ho

tu shaki-e-arbab-e-karam hai to mujhe kya

jis dar se nadamat ke siwa kuchh nahin milta

us dar pe tera sar bhi jo KHam hai to mujhe kya

main ne to pukara hai mohabbat ke ufaq se

raste mein tere sang-e-haram hai to mujhe kya

bhula to na hoga tujhe suqraat ka anjam

hathon mein tere saghar-e-sam hai to mujhe kya

patthar na paDen gar sar-e-bazar to kahna

tu motarif-e-husn-e-sanam hai to mujhe kya

main sarmad o mansur bana hun teri KHatir

ye bhi teri ummid se kam hai to mujhe kya