ai fikr-e-suKHan kyon zar-e-gul KHak se le aaun

ai fikr-e-suḳhan kyoñ zar-e-gul ḳhaak se le aa.uuñ

mazmūn agar kam hoñ to aflāk se le aa.uuñ

phir kaam haiñ kuchh aur bhī lekin dil-e-nādāñ

pahle to tujhe zulf ke pechāk se le aa.uuñ

kyā ganj-e-guhar kī mire dāman ko kamī hai

chāhūñ to abhī dīda-e-namnāk se le aa.uuñ

dikhlā.ūñ tumheñ apne qabīle kī nishānī

kuchh taar kisī pairhan-e-chāk se le aa.uuñ

chamke to añdhere meñ mirā turra-e-dastār

do chaar sitāre tirī poshāk se le aa.uuñ

yārāñ mujhe in chīzoñ se nashsha nahīñ hotā

varna to ye shai maiñ bhī rag-e-tāk se le aa.uuñ

bas yuuñ hai ki kuchh garmī-e-mahfil kā nahīñ shauq

maiñ aag to apne ḳhas-o-ḳhāshāk se le aa.uuñ

ai fikr-e-suKHan kyon zar-e-gul KHak se le aaun

mazmun agar kam hon to aflak se le aaun

phir kaam hain kuchh aur bhi lekin dil-e-nadan

pahle to tujhe zulf ke pechaak se le aaun

kya ganj-e-guhar ki mere daman ko kami hai

chahun to abhi dida-e-namnak se le aaun

dikhlaun tumhein apne qabile ki nishani

kuchh tar kisi pairhan-e-chaak se le aaun

chamke to andhere mein mera turra-e-dastar

do chaar sitare teri poshak se le aaun

yaran mujhe in chizon se nashsha nahin hota

warna to ye shai main bhi rag-e-tak se le aaun

bas yun hai ki kuchh garmi-e-mahfil ka nahin shauq

main aag to apne KHas-o-KHashak se le aaun