ai ishq shad-kaam hun tere shuur se

ai ishq shād-kām huuñ tere shu.ūr se

mujh ko gila nahīñ hai kisī ke ġhurūr se

ye intihā-e-hosh hai aage ḳhabar nahīñ

āvāz de rahā thā koī mujh ko duur se

qatre kī kyā bisāt patā bhī nahīñ chalā

ik mauj uTh ke rah ga.ī dariyā-e-nūr se

detā rahe zamāna fareb-e-nashāt ab

sar-ḳhush haiñ ham to bāda-e-ġham ke surūr se

qurbān terī nīm-nigāhī ke dekh phir

aatī hai mujh ko bū-e-mohabbat ġhurūr se

ai barq-e-husn izn-e-tamāshā kabhī hameñ

muusā nahīñ jo lauT ke aa jaa.eñ tuur se

ye husn ye shabāb ye ma.asūmī-e-jamāl

tum daad lo ḳhudā kī qasam jā ke huur se

kambaḳht us ne aur bhī majbūr kar diyā

baaz aa.e ham ilāhī dil-e-nā-subūr se

'fā.iq' mire mazāq meñ be-mā.egī sahī

dād-e-suḳhan-talab huuñ magar zī-shu.ūr se

ai ishq shad-kaam hun tere shuur se

mujh ko gila nahin hai kisi ke ghurur se

ye intiha-e-hosh hai aage KHabar nahin

aawaz de raha tha koi mujh ko dur se

qatre ki kya bisat pata bhi nahin chala

ek mauj uTh ke rah gai dariya-e-nur se

deta rahe zamana fareb-e-nashat ab

sar-KHush hain hum to baada-e-gham ke surur se

qurban teri nim-nigahi ke dekh phir

aati hai mujh ko bu-e-mohabbat ghurur se

ai barq-e-husn izn-e-tamasha kabhi hamein

musa nahin jo lauT ke aa jaen tur se

ye husn ye shabab ye masumi-e-jamal

tum dad lo KHuda ki qasam ja ke hur se

kambaKHt us ne aur bhi majbur kar diya

baz aae hum ilahi dil-e-na-subur se

'faiq' mere mazaq mein be-maegi sahi

dad-e-suKHan-talab hun magar zi-shuur se