ai jaan-e-intizar tere sehn ki taraf

ai jān-e-intizār tire sehn kī taraf

kyā aa ga.ī bahār tire sahn kī taraf

ab ro rahe haiñ hijr meñ vo sab darīche jo

khulte the bār-bār tire sehn kī taraf

tarġhīb ke baġhair kabūtar mire bhī kaash

uḌte kabhī-kabhār tire sehn kī taraf

dīvār khā ga.ī vo shajar jis kī shāḳh se

girte the kuchh anaar tire sehn kī taraf

qisse kiye jahāñ ne mire ḳhasta baam ke

mansūb be-shumār tire sehn kī taraf

karte haiñ baat phuul se ḳhushbū se ham magar

rū-e-suḳhan hai yaar tire sehn kī taraf

pās-e-adab hai is liye karte nahīñ haiñ piiTh

ham jaise ḳhāksār tire sehn kī taraf

ai jaan-e-intizar tere sehn ki taraf

kya aa gai bahaar tere sahn ki taraf

ab ro rahe hain hijr mein wo sab dariche jo

khulte the bar-bar tere sehn ki taraf

targhib ke baghair kabutar mere bhi kash

uDte kabhi-kabhaar tere sehn ki taraf

diwar kha gai wo shajar jis ki shaKH se

girte the kuchh anar tere sehn ki taraf

qisse kiye jahan ne mere KHasta baam ke

mansub be-shumar tere sehn ki taraf

karte hain baat phul se KHushbu se hum magar

ru-e-suKHan hai yar tere sehn ki taraf

pas-e-adab hai is liye karte nahin hain piTh

hum jaise KHaksar tere sehn ki taraf