ai kahkashāñ-navāz muqaddar ujaal de
merī taraf bhī ek sitāra uchhāl de
ham puure āftāb ke qābil nahīñ agar
thoḌī sī piilī dhuup hī āñkhoñ meñ Daal de
haañ kahte kahte gung na ho jaa.e dil kahīñ
yārab mirī zabān ko tāb-e-savāl de
rogī huā hai dhuup ko tarsā huā badan
ai māmtā supūt ko ghar se nikāl de
koī to dostoñ se mire dostī kare
koī to mehrbāñ ho balāoñ ko Taal de
tū lafz-gar to hai tujhe shā'ir kaheñge jab
ik be-zabān harf ko naġhme meñ Dhaal de
bijlī kā tiir jaise dhanak kī kamān meñ
kyā aur is shabāb kī koī misāl de
'bāqar' is āftāb meñ jauhar hai is qadar
aa jaa.e josh meñ to samundar ubaal de
ai kahkashan-nawaz muqaddar ujal de
meri taraf bhi ek sitara uchhaal de
hum pure aaftab ke qabil nahin agar
thoDi si pili dhup hi aankhon mein Dal de
han kahte kahte gung na ho jae dil kahin
yarab meri zaban ko tab-e-sawal de
rogi hua hai dhup ko tarsa hua badan
ai mamta suput ko ghar se nikal de
koi to doston se mere dosti kare
koi to mehrban ho balaon ko Tal de
tu lafz-gar to hai tujhe sha'ir kahenge jab
ek be-zaban harf ko naghme mein Dhaal de
bijli ka tir jaise dhanak ki kaman mein
kya aur is shabab ki koi misal de
'baqar' is aaftab mein jauhar hai is qadar
aa jae josh mein to samundar ubaal de
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
