ai KHuda bharam rakhna barqarar is ghar ka

ai ḳhudā bharam rakhnā barqarār is ghar kā

hai tire karam par hī inhisār is ghar kā

har kivāḌ Duubā hai be-karāñ udāsī meñ

aur har darīcha hī sogvār is ghar kā

phailtī chalī jaa.e bel bad-gumānī kī

ḳhatm hī nahīñ hotā intishār is ghar kā

is jahāñ meñ hogā be-amal na ham jaisā

ham na rakh sake qaa.em e'tibār is ghar kā

kis qadar gunāhoñ ke murtakib hue haiñ ham

jo sukūn luTtā hai baar baar is ghar kā

gard be-yaqīnī kī gar sameT leñ mil kar

mo'tabar gharoñ meñ ho phir shumār is ghar kā

jaan se guzarne kā hausla atā kar de

ab makīñ na ho koī sharmsār is ghar kā

ai KHuda bharam rakhna barqarar is ghar ka

hai tere karam par hi inhisar is ghar ka

har kiwaD Duba hai be-karan udasi mein

aur har daricha hi sogwar is ghar ka

phailti chali jae bel bad-gumani ki

KHatm hi nahin hota intishaar is ghar ka

is jahan mein hoga be-amal na hum jaisa

hum na rakh sake qaem e'tibar is ghar ka

kis qadar gunahon ke murtakib hue hain hum

jo sukun luTta hai bar bar is ghar ka

gard be-yaqini ki gar sameT len mil kar

mo'tabar gharon mein ho phir shumar is ghar ka

jaan se guzarne ka hausla ata kar de

ab makin na ho koi sharmsar is ghar ka