ai KHush-qadam gawara ye zahmat agar karo

ai ḳhush-qadam gavārā ye zahmat agar karo

kuchh din harīm-e-jāñ meñ hamāre basar karo

kuchh nā-tarāsh sang haiñ mere bhī haath meñ

gardūñ-nashīno mujh meñ bhī paidā hunar karo

āñkhoñ ke āsmāñ meñ hai ḳhvāboñ kī kahkashāñ

is kahkashāñ kī sair ba-rang-e-digar karo

ik ye bhī rasm hai ki tamanna kī raah meñ

manzil kā koī qasd na ho aur safar karo

maiñ ne matā'-e-zīst gañvā.ī so dil-rubā

ab tum bhī intizār mirā 'umr bhar karo

roīdagī se ḳhālī paḌī hai zamīn-e-dil

ai chashm-e-abr-ḳhez ise tar-ba-tar karo

rang-e-hinā.ī phīkā agar paḌ gayā to kyā

phir ḳhūn-e-ārzū se ise tāza-tar karo

ai KHush-qadam gawara ye zahmat agar karo

kuchh din harim-e-jaan mein hamare basar karo

kuchh na-tarash sang hain mere bhi hath mein

gardun-nashino mujh mein bhi paida hunar karo

aankhon ke aasman mein hai KHwabon ki kahkashan

is kahkashan ki sair ba-rang-e-digar karo

ek ye bhi rasm hai ki tamanna ki rah mein

manzil ka koi qasd na ho aur safar karo

main ne mata'-e-zist ganwai so dil-ruba

ab tum bhi intizar mera 'umr bhar karo

roidagi se KHali paDi hai zamin-e-dil

ai chashm-e-abr-KHez ise tar-ba-tar karo

rang-e-hinai phika agar paD gaya to kya

phir KHun-e-arzu se ise taza-tar karo