ai ki tujhse taqat-e-parwaz baal-o-par mein hai

ai ki tujh se tāqat-e-parvāz bāl-o-par meñ hai

vo bulandī de jo azm-e-hausla-parvar meñ hai

qatra-e-ashk-e-nadāmat merī chashm-e-tar meñ hai

pesh kartā huuñ vahī yā-rab jo mere ghar meñ hai

mai kā har qatra huā hai hāmil-e-kaif-e-tamām

goyā mai-ḳhāna kā mai-ḳhāna mire sāġhar meñ hai

dard ḳhud hī vaz.a kar letā hai sāmān-e-ḳhalish

maujzan merā hī ḳhūn-e-dil rag-e-nashtar meñ hai

ho ke dāman-chāk asliyyat ko uryāñ kar diyā

kyoñ ye saudā-e-numā.ish har kalī ke sar meñ hai

ai junūñ dīvār-o-dar kī toḌ de had-bandiyāñ

dekhnā phir vus.at-e-sahrā hamāre ghar meñ hai

dil meñ hai kaifiyyat-e-sāġhar kī mujh ko justujū

aur dil Duubā huā kaifiyyat-e-sāġhar meñ hai

nafs-e-sarkash tū na thā āmāda-e-sajda magar

ik kashish ik jāzbiyyat tere sang-e-dar meñ hai

tangī-e-dasht-e-junūñ kā kaun fariyādī huā

ek mahshar aur barpā arsa-e-mahshar meñ hai

dekhiye zauq-e-safā-keshī kā ho anjām kyā

qismat-e-ā.īna 'muslim' dast-e-askandar meñ hai

ai ki tujh se taqat-e-parwaz baal-o-par mein hai

wo bulandi de jo azm-e-hausla-parwar mein hai

qatra-e-ashk-e-nadamat meri chashm-e-tar mein hai

pesh karta hun wahi ya-rab jo mere ghar mein hai

mai ka har qatra hua hai hamil-e-kaif-e-tamam

goya mai-KHana ka mai-KHana mere saghar mein hai

dard KHud hi waza kar leta hai saman-e-KHalish

maujzan mera hi KHun-e-dil rag-e-nashtar mein hai

ho ke daman-chaak asliyyat ko uryan kar diya

kyon ye sauda-e-numaish har kali ke sar mein hai

ai junun diwar-o-dar ki toD de had-bandiyan

dekhna phir wusat-e-sahra hamare ghar mein hai

dil mein hai kaifiyyat-e-saghar ki mujh ko justuju

aur dil Duba hua kaifiyyat-e-saghar mein hai

nafs-e-sarkash tu na tha aamada-e-sajda magar

ek kashish ek jazbiyyat tere sang-e-dar mein hai

tangi-e-dasht-e-junun ka kaun fariyaadi hua

ek mahshar aur barpa arsa-e-mahshar mein hai

dekhiye zauq-e-safa-keshi ka ho anjam kya

qismat-e-aina 'muslim' dast-e-askandar mein hai